Rakhe ka Seinraij LPS Mukhap ia lyngkhuh snem sngi iap U Kiang Nangbah

Syllad | The Rising MeghalayaDecember 30, 2020

Ki bor pyniad ka Seinraij Lower Primary School, Mukhap kum shibynta ban pynphriang bad khring ia ka pyrkhat pyrdain ki khynnah skul shaphang ki kam bad ka jingim U Kiang Nangbah, khlawait ka Ri Khadar Dolloi ha une u snem kala shim ban pynlong ka jingrakhe kynmaw burom ia ka lyngkhuh snem sngi iap ba 158 jong une u Khlawait uba len lade ba ai ia ka jingim na ka bynta ka ri bad ka jait  bynriew.

Ia kane ka jingrakhe kynmaw burom la pynlong ha ryngkat ka jingbur ryntih ia ki kyndon ka sorkar ha kaba lawan ban sakhilang ruh da u ma Nujorki Sungoh, MLA ka thain kum u kongsan bad u ma W.G. Sungoh, MDC ka thain kum u symbud kongsan ha ryngkat ka jingiadonlang ki dkhot ka shnong Mukhap.

Ha ka jingialang ba i shongkun ba la pyniaid da u ma H.Sungoh, Chairman School Managing Committee ladon ka jingsngapjar kum ka dak ka jingkynmaw burom ia u Kiang Nangbah bad kiwei ki riew ialeh ka ri pynbud pat sa da ka nguh ka dem na u ma S. Lapasam.

Ki riew rangbah kiba la ai jingkreh ha ka jingiadei bad kane ka sngi ki long u ma Teibormi Papang, Secretary School Managing Committee uba la ai ka jingiathuhkhanna lyngkot  shaphang ka jinglong jingim u Kiang Nangbah katba u ma W.G.Sungoh, MDC JHADC kum u symbud kongsan haba ai jingkreh ha kum kane ka sngi u ong, kum ki pateng ka jaitbynriew bad ka ri kiba im ha kane ka juk mynta ngi dei ban bud ia ki jinglongkyrpang u Kiang Nangbah kum ha kaban ai ia ka jingshakri ba Hok, ban long kiba shlur bad ban don ka mynsiem ia tylli.

Kum u nongmihkhmat hapoh ka iing Dorbar  jong ka JHADC u ong, haba phai sha kine ki sngi ki por ba mynta la iohi ba ka jingioh kyrpang ka jaitbynriew ia ka Khyrnit ba Hynriew ne ka Sixth Schedule kam long shuh kaba don ia ka bor bad ka iktiar bad kine kiei kiei ki buh ia ka jaitbynriew ha ka jingma.

U ma Nujorki Sungoh haba kren kum u kongsan u da ai mynsiem ia ki khynnah ba kim dei ban long kiba duh jingkyrmen ha ka jingim la phi wan na ka longiing kaba duk da kaba kdew ruh ia ka nuksa babha u Kiang Nangbah kum u briew uba wan na ka longiing  ka byn dei na ka jait Syiem ne Dolloi hynrei dei ki kam jong u kiba rah bad tynrong ia u sha ka kyrdan Nongialam ka ri Khat-ar Dolloi.

Shuh shuh ha kane ka sngi ladon ruh ka jingsam ia ki Syrnot  sha ki khynnah kiba la jop ha ka jingiakop thoh kyntip shaphang u Kiang Nangbah  bad ruh la pynphuh pynphieng bad pynshongshit ia kane ka sngi da ka jingpule kyntien ne Recitation shaphang u Kiang Nangbah bad ka jingshad na ki khynah skul.