Rakhe ka KSU-EJH ia ka Sngi Kyrsiew Ri bad thang ia ka CAA Rule

Syllad | The Rising MeghalayaApril 4, 2024

Ka Khasi Students’ Union (KSU) East Jaintia Hills District Unit ka la ioh ban rakhe ia ka ‘Sngi Kyrsiew Ri’ lane ka ‘Khasi National Awakening Day’ haka 4 tarik Iaiong ha ka jingialang ba la pynlong hakhmat u dur mot sahnam jong u Woh Kiang Nangbah hapoh ka District headquarter ha Khliehriat.

Ha kane ka jingrakhe la ia don lang kiwei pat ki para sengbhalang kiba kynthup naduh ka FKJGP, HNYF bad ka AJYWO nalor ki seng ki nongniah kali kamai.

Nalor kata ha kane ka jingialang ka Seng ha ryngkat bad ki paralok sengbhalang kiba la wan iashim bynta lang ki la pynlong ruh ka jingthang ia ki kyndon jong ka Citizenship Ammendment Act (CAA) 2019 rules bad pynpaw iaka jingpyrshah bad dawa ruh ban pyntreikam iaka Inner Line Permit ha Jylla.

Shuh shuh shi bynta ban pynpaw ka jingpyrshah jur halor ka jingthmu jong ka sorkar ban wanrah ia ka lynti rel sha ka thain East Jaintia ka seng ka la sam ruh ia ki kot lyngkdop ba la pynkhreh da ka lad pathai jong ka seng sha ki paidbah ha Khliehriat shibynta ban pynsngewthuh sha ki paidbah kumno ba ka jingwan jong ka lynti rel kan ktah ia ka thain bad ia ka jylla hi baroh kawei.