Rakhe ka  Bharat Scouts & Guides iaka Foundation Day

Syllad | The Rising MeghalayaNovember 11, 2022

Ka Meghalaya Bharat Scouts & Guides, West Jaintia Hills haka sngi Thohdieng kala rakhe iaka 73rd Foundation Day ha Jowai.

Ha kane ka jingrakhe iaka sngi seng nongrim iaka Bharat Scouts & Guides la pynlong iaka jingialang kaba lyngkot kaba pyniaid da u Adiam U Bthuh, District Secretary MBS&G-West Jaintia Hills. Ha kane ka jingiakynduhlang nalor ki Scouts-Guides, Rovers-Rangers bad ki Unit Leaders lawan iashimbynta ruh da ka Kong STariang, Vice-President, MBS&G-West Jaintia Hills kum ka kongsan bad u Ma DE Pariat, Principal Lissi Pearl  Secondary School Mukhla kum u symbud kongsan ha ryngkat ka jingiadonlang ka Rosie Bang, DOC (G) bad u Carefully Gassah, DOC(S).

U Ma DE Pariat haba kren u la pynkynmaw ia ka jinglong kyrpang jong kane ka sngi bad u la khot bad wer ruh ia ki paradkhot ba kin shim ka jingkitkhlieh ha kaban leh ia ki kam babha na ka bynta ka imlang sahlang jong ka ri bad ka jaitbynriew.

Ka Kong S Tariang, Vice-President, MBS&G-West Jaintia Hills haba kren ka la ong haba shim ban kynmaw burom ia ka Foundation day ka dei ruh ka por ba ngin kynmaw burom ia u Nongseng ka Movement u Lord Baden Powel bad ki nongprat lynti ia ka Seng ha ka Ri bad ka Jylla.

Shuh shuh ka la pynkynmaw ruh ia ki para dkhot ia ki nongrim treikam jong ka Movement bad ki kamram ba dei ban leh kumba la shim ia ka Jingkular ban shakri ia ki parabriew da ka jingsngewieit bad jingsngewburom  khlem da wanrah ka jingsngewiapher.

Shwa ban poi shaba kut jong kane ka jingiakynduhlang ladon ruh ka jingpynlait ia ki 73^rd Foundation Day Sticker bad ka jingpynkup burom ia ki Unit Leaders ba la ioh ia ka nam Best Scouts Master-Best Guides Captain.