Rakhe International Yoga Day ka Art of Living ha West Jaintia Hills

Syllad | The Rising MeghalayaJune 21, 2021

Ka Rilum Jaintia lyngba ka Art of Living, Jaintia Hills Unit kala snohktilang bad ka pyrthei shityllup ban rakhe iaka International Yoga Day mynta ka sngi 21 Jylliew 2021.

Namar ka jingwan lynsher ka khlam COVID-19 ym shym la ioh ban pynlong iaka prokram paidbah ne ban ia leh Yoga, hynrei la shu ia leh online lyngba ka kor internet.

Ha Jowaui la pynkhreh da ki bor pyniaid ka Art of Living, Jaintia Hills Unit hapoh ka jingialam u Pearlet Toi, President Art of Living Jaintia Hills ryngkat u Kamnipaia Challam, Art of Living Instructor bad kiwei ki dkhot.

Kum ban shu pynkynmaw kane ka sngi ka la wan urlong da ka jingshimkhia u Prime Minister ka Ri u Narendra Modi ban pynsngew hakhmat ka Dorbar jong ka United Nation General Assembly kaba la shong ha u bnai September jong u snem 2014.

Ha une u snem kane ka jingrakhe ia ka International Day of Yoga ka long ka sien ba hynniew bad ki briew ba ju bang bad mlien ban leh ia ka Yoga naduh ki riew paidbah haduh ki nonghikai na la ki iing ki sem da ka mynsiem shitrhem ki iashimbynta shongshit ban pyni sha ka pyrthei ia ka jinglong kyrpang jong kane ka sngi kumba la pruid dak da ka United Nation General Assembly.

U Kamnipaia Challam, Art of Living Instructor haba kren maitphang shwa ban sdang ka jingleh Yoga u da ai mynsiem ia ki briew ba iashimbynta ba kin long kiba iaishah namar ha lyndet ka jinglah ban leh tikna ia ka Yoga kin sa mih paw ki dak ki shin jong ka jingkyrkhu bad ka jingmyntoi khamtam ha ka jingiadei bad ka koit ka khiah, ka met ka phad, ka pyrkhat ka pyrdain kiba long shibynta ki atiar ha ka longrynieng ryniot jongngi ki briew bad ki rukom jong ka Yoga kiba la shim ban leh ha kane ka sngi ki long ka Surya Namaskar, ka Asana, Breathing Pranayam, Meditation bad pynkut pat da ka Universal Prayer.