Rai set phatok ka iingkashari 2 snem ia u Marson Lamin

Syllad | The Rising MeghalayaJune 22, 2024

Ka iingkashari jong u Session Judge Noor Ain Khan (MHJS), West Jaintia Hills District, Jowai ha ka 14 tarik Jylliew ka la rai pynrem ia u koidi uba kyrteng u Marson Lamin da kaba set phatok 2 snem ha ryngkat ka kuna kaba T.5000 (San hajar) namar ka jingdonkti ha kaba thombor ia u Bah Comfortme Phawa kat haduh ba un da mynsaw jur.

Hynrei, namar une u koidi u la dep shong lypa ha phatok mynta lah shi snem 22 sngi, kumta ruh u Marson Lamin un hap ban pyndep ia ka jingshah set phatok satang na ka bynta 11 bnai bad 11 sngi.

U Superintendent of Police, West Jaintia Hills, ula pyntip ba kane ka jingjia ka dei kaba la jia naduh u bnai Rymphang 2015, kata hadien ba ka Kong Melinda Phawa ka la ujor da ka ejahar hapoh Ummulong Beat House ha ka 27.02.2015, da kaba kynnoh ba u khun jong ka u Comfortme Phawa u la shah thombor da kaba shah dung da ka kynja tiar ba nep na ki bynta u ryndang ha u Marson Lamih ha ka miet 26.02.2015 ha ka por kumba 9 baje.

Halor kane ka jingjia la rejister case hapoh Jowai Police Station hapoh ki kyndon ain jong ka IPC ha kaba la pynlong ruh mardor ia ka jingtohkit lyngba u  S.I W. Suting. Nalor kata ia kane ka case la chargesheet ha ka 07.03.2024.