Rai sangeh iashimbynta ka shong Tangnub haka elekshon MDC ka JHADC

Syllad | The Rising MeghalayaJanuary 11, 2025

Ki nongshong shnong ka Tangnub, East Jaintia Hills District haka 10 tarik Kyllalyngkot kila leit tur paidbah sha ka ophis treikam ka Jaintia Hills Autonomous District Council (JHADC), Jowai namar ka jingbym sngap iaka jingpyrshah halor ka jingpynkynriah iaki na Sutnga Nongkhlieh Constituency sha Saipung Nongkhlieh Constituency haka jingpynbeit constituency thymmai ka Council.

Ha kane ka jingtur sha JHADC, ki nongshong shnong ka Tangnub kila rai ruh ban Boycott ne ban sangeh iashim bynta haka Election MDC ka ban long haka 21 tarik Rymphang.

Ha kane ka jingleit tur ki nongshong shnong ka Tangnub, namar ka jingbym don u CEM jong ka JHADC, u Waheh Shnong bad katto katne ngut ki nongialam Shnong ki la leit iakynduh iaka Secretary jong ka JHADC ban kyrpad ia ka ban pynphai biang ia ka Shnong jong ki sha ka Constituency kaba barim, kata ka Sutnga Nongkhlieh Constituency, hynrei na ka liang jong ka Secretary ka la ong ba ka bor ka shong ha ka Executive Committee.

Ki nongshong shnong ki la rai ban sah miet noh ha JHADC bad rai ban leit phai iing haduh ba ki la iakynduh ia u Chief Executive Member u Ma Thombor Shiwat. Da ka jingtuklar jong u SP jong ka West Jaintia Hills District u Ma Chemphang Syrti, ki nongshong shnong ki la mynjur ban leit phai iing.

Halor kane u Waheh shnong Tangnub Alfund Sutnga ula ong ba kila dep ban ujor da ka jingthoh sha ka Delimitation Committtee jong ka JHADC bad kila dep ruh ban pyrshah haka Public hearing, hynrei ka Delimitation Committtee ka khlem sngap iaka jingkyrpad ka jong ki.