Rai ka Sorkar ban pynkynriah ia ki nongdie madan sha ki jaka kyrpang ha Khyndailad bad thain Civil Hospital

Syllad | The Rising MeghalayaNovember 27, 2024

Ka Sorkar Jylla ka la rai ban pynkynriah ia ki nongdie madan sha ka jaka ba la pynkhreh ha Khyndailad bad ki jaka ha ki thain Civil Hospital ha ka kylla kaba nyngkong.

Kane ka dei ka jingshim rai lang ha ka jingialang ba la pyniaid da u Symbud Myntri Rangbah uba khmih ia ka Tnad Urban Affairs, u Myntri ka Tnad Tourism, Myntri ka Tnad ka rep ka riang, Myntri ka Tnad Animal Husbandary & Veterinary bad ki nongmihkhmat na ka Tnad ka koit ka khiah, Tnad kam pohiing, PWD bad kiwei pat nalor ki kynhun kiba don bynta.

Ia kane ka rai la shim ruh katkum ka jingbthah jong ka iingkashari Meghalaya High Court kaba la bthah ia ka Tnad Urban Affairs ban thaw ia ka Committee kaba kynthup ia ki bor ba dei khmih ban ithuh ia ki jaka die jingdie na ka bynta ki nongshong dukan madan.

Haba pynpaw halor kane u Additional Secretary ka Tnad Urban ha ka 26 tarik u Naiwieng u la ong, “La shim ia ka rai ba ha ka kylla kaba nyngkong yn pynkynriah ia ki nongshong dukan die madan sha ki jaka ba la pynkhreh ha Khyndailad bad ki jaka ha i thain Civil Hospital.”

“Ka Tnad la khmih lynti ba kan ithuh ia ki jaka shong die jingdie bad ban pyntip mardor ia kane sha kito ki nongshong dukan madan. Hadien kane ki nongshong dukan kin ioh por 30 sngi ban kynriah noh hadien ba la ai ia ki certificate katkum ka skhim,” ong ka khubor.

“Ka Town Vending Committee (TVC) ka la don ha ka jingiakren kaba man ka por bad ka seng ki nongdie madan bad ka la shim ia ka sienjam baroh ban pynthikna ba ia kane ka jingpynkynriah jaka yn pyntreikam ha ka rukom kaba ryntih. Ia kane ka jingthmu ba la mynjur yn sa pynbna paidbah,” la bynrap.

Ban iada ia ki hok jong ki nongshong dukan madan bad ban pynbeit ia ki kam die jingdie ha ki surok ka Sorkar India ka la thaw ia ka ain Street Vendors (Protection of Livelihood and Regulation of Street Vending) Act, 2014. Kane ka ain ka bthah ia baroh ki jylla ban thaw ia ki Town Vending Committee, ban ithuh bad register ia ki nongshong dukan madan bad ban pyniapher ia ki jaka die jingdie bad ki jaka bym dei ban die jingdie.

Haba pyntreikam ia katei ka ain, la thaw ia ka Town Vending Committee (TVC) ha u snem 2022. Ia kane ka TVC la pyniaid da u CEO ka Shillong Municipal Board (SMB) bad ka kynthup ia ki nongmihkhmat na ka ophis Deputy Commission, ka Tnad pulit, ka Tnad Urban, Municipal Board, Rangbah Shnong, ka State Urban Livelihood Mission bad ki seng jong ki nongshong dukan madan. Ka TVC  ka la pynlong haduh 10 tylli ki jingialang ban iamir jingmut halor ka mat kaba iadei bad ki nongshong dukan madan.

Nalor kata ka skhim ka ai ia ki nongrim ba la ialam na ka bynta ban jied ia ki nongdie bad ki jaka die kiba dei hok na ka bynta ban pynkynriah ia ki sha ki jaka ba la pynbna. La pynlong ruh ia ka jingjurip ha ki 22 tylli ki jaka hapdeng u Nohprah 2023 bad Kyllalyngkot 2024, kata katkum ki kyndon ba la kdew ha ka skhim.

Kine ki jaka ba la kdew ki kynthup ia ka Khyndai Lad, Assembly, Barik, Dhankheti, Firebridge, G.S Road., Governor, IewMawlong, Laban, Jail Road, Lachumiere, Laitumkhrah Firebrigade, Lumshatsngi, Malki, Motphran, Polo, Qualapatty, Umsohsun, Wahthapbru, . bad Wards Lake.