Rai ka Seiñraij Jowai ban pynlong ïaka Behdieñkhlam ryngkat ka jingrakhe dap 75 ba ioh laitluid ka Ri India

Syllad | The Rising MeghalayaJune 17, 2021

Ka Seinraij Jowai kala pynbna paidbah ba kan pynlong iaka lehniam Behdieñkhlam mynta ka kynti ruh da kaba bud ryntih iaki kyndon bad ki adong adit COVID-19.

“Ka jingmut hi jong ka Behdieñkhlam ka dei ban beh iaka sniew ka smeh ha ka imlang sahlang, kumta hadien bala ioh jingbit na ka bor shynshar district ban pyndep iaki jinglehniam baroh shisnem ngi la iaid shakhmat ban pynkhreh iaka Behdieñkhlam, kaba dei artad kaba tamasa kaba la khring ia kiba bun wat la ngi hap ban pynrit ne pynheh iaka rukom lehkmen,” la ong u ma OR Shallam, President Seiñraij Jowai haba iakren bad ki nongthoh khubor haka sngi Palei.

“Ka Ministry of Culture jong ka sorkar pdeng ruh kala ai jingmut ban lehkmen ïaka Behdieñkhlam da kaba kynthuplang iaka jingioh laidluid ba 75 snem ka Ri India bad ka sorkar Meghalaya ka ban dap 50 snem ka jingioh jylla ba pura jong ka,” la ong u ma Shallam.

Ula ong ruh “Ka Seinraij Jowai kala rai ban iaid shakhmat lada ka jingpynkhreh iaka Behdieñkhlam kan long kaba rit ne kaba heh bad iaka SOPs ngin sa phah sha ka sorkar.”

Kumban shu pynkynmaw ba mynshem snem ruh ka Seinraij Jowai kala pynlong Behdieñkhlam tang da ki jinglehniam ainguh aidem bad la pyndam ia baroh ki jingshad ha ki jaka paidbah.

Shuh shuh ha kaba iadei bad ka jingpynkhreh iaka Behdieñkhlam, kumba ju long manla u snem ka Dorbar Niam jong ka Raij Jowai hapoh ka jingkhmih jingpyniaid u Dolloi kum u khlieh ka niam ka Elaka haka sngi Palei kila pyndep iaka lehniam Knia Khang ban ainguh aidem ba shisien shisnem ia ki Soo Dwar Sooluti bad ka Tawiar Takan kiba long ki Ryngkew ki basa ba ieng ban iada ia ka Shnong ka Raij na ka tyrut ka smer, ka sniew ka smeh bawan ha ki dur ki rukom bapher.

Ha shwa ban poi ka sngi jong kane ka jinglehniam ne knia ainguh ki shakri niam ka Raij naduh u Doloi, u Pator, u Langdoh, ki Sangot, ki Wasan ryngkat ki riew rangbah ka Seinraij ki la iamih shakhmat ka Iew ka hat ban pyndep ia kawei na ki rukom, dustur ba la tip kum ka Kbai Mooknor.

Ka jingmut jong kane ka jinglehniam ka long ban ainguh aidem ia u Trai Nongbuh nongthaw bad ki Lei Shnong- Lei Raij na ka bynta ki jingkyrkhu ba laioh bad ruh ban kyrpad kyrpon ba kin da kin ker ia ka shnong ka raij na ka tyrut ka smer, ka pang ka shitom, ka khlam ka nguh jong kane ka juk bad ruh ban kin theh sei pat ki jingkyrkhu ha ka shnong- ka raij ioh ba ka shongsuk shongsain kan synshar, bad  ka roi ka par ba dap biang ha baroh ki liang.