Rah nam lahduh ki thei ialehkai ka Shillong CA ha ka lympung U-15 Girls Inter-District Cricket Tournament

Syllad | The Rising MeghalayaMarch 14, 2025

Ki thei ïalehkai ka Shillong Cricket Association (SCA) ki la ioh rah ia ka nam lahduh jong ka lympung ïalehkai U-15 Girls Inter-District Cricket Tournament 2025, ba la pynlong ïa ka da ka Meghalaya Cricket Association bad ba la pyniaid ïa ka da ka Synjuk West Khasi Hills District Cricket Association ha madan Mawrusyiar Village Playground, Nongstoin.

Ki thei ïalehkai ka Shillong Cricket Association, ki la lah ban pynliem noh ïa ka South West Khasi Hills District Cricket Association (SWKHDCA) da 41 run ha ka jingialehkai final kaba la shim jingkhein da ka DLS Method, hadien ka jingther slap kynsan hapdeng ka jingialehkai kaba long haka 12 tarik Lber.

Haba phai sha ka jingïakhun, ïa ka jingkynting pisa la jop da ka SWKHDCA, da kaba ki la ailad shwa ïa ka SCA ba kan wan ba kan tied nyngkong, ha kaba ki la lah ban kamai 166/3 na ki 20 over. Ki namtam ïa ka SCA ha ka por ba ki la wan ban bat ki long ka Janvi Kumar Shah  58 runs (67 balls), Laviola L Mawlong  28 runs (32 balls) bad Prisceca Nongpiur –16 runs (30 balls).

Katba na ka liang ki nongkawang bol ka SWKHDCA, ka Ribakordor Nongsiej ka la ïoh ba kan khur shi wiket na ka bynta 40 ron na ki 4 over.

Haba beh ïa kane ka thong, ka SWKHDCA ki la shem pynban ïalade ha ka jingeh kaba jia hadien ba u slap ruh u la wan ban ther, bad kane ka pynlong ïa ki nongpynïaid ban pynhiar noh ïa ka jingiakhun sha ka 9.3 over, ha kaba ka thong ia ka SWKHDCA ka long 116 run.

Hadien ba la pynbeit thymmai, ki thei ïalehkai ka SWKHDCA ki la lah ban kamai 74 run hadien ba ki la hap noh 7 wicket, bad kane ka la biang pura ïa ki thei ïalehkai ka SCA ban rah ia ka nam kum ki lahduh jong kane ka lympung.

Ki katto katne ki thei ïalehkai kiba la kham paw ha ka pali kaba ar ki long ka Lawanjingkyrmen Lyngkhoi 13 runs (15 balls), Philadaplin Lyngkhoi 11 runs (9 balls).

Katba na ka liang ki thei kawang bol ka SCA ka Prisceca Nongpiur na ki 4 overs, ka la ai 17 runs, bad khur 2 wicket bud pat sa ka Areniankit Warjri  na ki 2 over, ka la ai  10 run, bad  1 wicket, katba ka  Laviola L Mawlong  na ki 0.3 over,  ka la ai 3 run, bad khur 2 wicket.

Ki kynrem ki lyndan kiba la wan ban ïa sakhi lang ïa kane ka phainal ka kynthup ïa u Hony Secretary u bah Raynold Kharkamni, u Sengnab Momin, Vice President, Meghalaya Cricket Association, u bah Peter Macdonald Kharsawian, Apex Council Member, MCA, Lamborful Wanniang, President, Mawrusyiar Youth and Cultural Club, Shembor Rani, Secretary, Mawrusyiar Youth and Cultural Club, Wanpyntngenbor Lyngdoh Nonglait, President, West Khasi Hills District Cricket Association, Mebanphira Swer, General Secretary, West Khasi Hills District Cricket Association .