Rah ka St. Alfred ia ka nam lahduh ha ka ‘District Level Inter School Athletic Meet 2025’ ha Ri Bhoi

Syllad | The Rising MeghalayaApril 18, 2025

Ka St. Alfred Secondary School ka la long ka lahduh ha ka lympung ialehkai sport ‘District Level Inter School Athletic Meet 2025’ jong u DSO Ribhoi kaba la kut noh ha ka 17 tarik Iaiong.

Kane ka la wan long hadien ba ki khynnah ialehkai jong ka St. Alfred ki la trei borbah bad ioh ban khur haduh 9 tylli ki trophy kiba naduh ki best team, Best Athlete ha ki kyrdan bapher bapher ryngkat bad ki takma naduh ka sngi ba la sdang ïa kane ka lympung.

Kane ka lympung ïalehkai ba 3 sngi ka la long shi sha kaba itynnad na ka jingwan ban iashimbynta haduh 36 tylli ki skul kaba la kot shaduh 901 ngut ki nongiashim bynta ha ki 15 tylli ki jait jingialehkai kiba la phiah haduh 6 tylli ki kyrdan ha kaba ki nongialehkai ki la ïa shim bynta shitrhem ban ïakhun tyngeh ban khur takma na ka bynta la ki jong ki skul.

Ka St. Alfred Sec. School ka la ioh ban rah ia ka nam lahduh da kaba ioh ruh ban khur ruh ïa ka khusnam Best Team ha ka kyrdan Under 14 jong ki kynthei, Under 16 jong ki kynthei bad Under 18 jong ki shynrang bad kynthei.

Katba kiwei kiwei ki skul kiba ioh ban rah ia ka best team kynthup ia ka MeECL Sec. School haka Under 14 jong ki shynrang, St. Judes Sec. School haka Under 16 jong ki shynrang, bad la sam ruh iaki khusnam sha ki rang bad ki thei kiba khur ia ka nam kiba nongïalehkai kiba kynsai tam ha katei ka lympung.

Na ka liang ka ophis u District Sports Officer ka la pyntip ruh ba ki nongjop ha kane ka lympung kin sa ïoh ïaka lad ban pyntbit shuh shuh ialade ha kine ki sngi ki ban wan ban pynkhreh kham bha shuh shuh na ka bynta ka State Level Inter School Athletic Meet 2025 ka ban sa long ha nongbah Shillong.

U kongsan uba la wan sakhi lang dei u Deputy Commissioner ka Ri Bhoi u Abhilash Baranwal, haka jingïadon lang ka u Addl. SP ka Ri Bhoi u Naman Kumar, ka Kong KB Jyrwa District School Education Ophisar, Ribhoi, Bah Bobby L Nongbet, District Sports Ophisar lem bad ki dkhot ka RBDSA bad kiwei kiwei.