Rah ka North Liberty iaka nam overall champion haka Inter School Athletic Meet ha Jowai

Syllad | The Rising MeghalayaApril 25, 2025

Ka North Liberty Higher Secondary School (NLHSS) kala ioh khur iaka nam Overall Champion haka District Level Inter School Athletic Meet 2025 kaba la poi noh sha kaba kut haka 25 tarik Iaiong ha Kiang Nangbah Stadium.

Ia kane ka athletic meet la pyniaid da ka ophis u District Sports Officer, (DSO), West Jaintia Hills ryngkat ka jingiatreilang ka West Jaintia District Sports Association (WJDSA) bad la wan ban pynhap pyrda iaka da u MLA ka Jowai Ma Wailadmiki Shylla kum u kongsan.

Ka North Liberty Higher Secondary School ha kane kynti ka la khur 26 tylli ki takma ksiar, 16 tylli ki takma rupa bad 12 tylli ki takma rnong. Ka North Liberty kala rah ruh iaka nam ‘Best Athlete’ haka kyrdan Under-14 bad Under-18 naka liang ki kynthei.

Iaka nam ‘Best Athlete’ jong ka kyrdan Under-14 naka liang ki shynrang la ioh da ka skul HK Singh Secondary School ba la mihkhmat da u Resource Wellson Sayoo haka jingiakop In back Throw Triathlon-C. Katba na ka liang ki kynthei la ioh da ka St. Mary Mazzarrello Higher Secondary School bala mihkhmat da ka Wanpyntngen Lytep haka jingiakop Triat-C Long Jump.

Haka kyrdan Under-16 naka liang ki shynrang la ioh da ka skul Govt. Boys HS School ba la mihkhmat da u Acharan Talang haka jingiakop mareh ba 60 metre, katba haka liang ki kynthei la ioh da ka North Liberty Higher Secondary School ba la mihkhmat da ka Saphika Pyrtuh haka jingiakop haka jingiakop mareh ba 60 metre.

Haka kyrdan Under-18 naka liang ki shynrang la ioh da ka Kiang Nangbah Higher Secondary School ba la mihkhmat da u Yearmanwill Rymbai haka jingiakop mareh kaba 100 metre, katba na ka liang ki kynthei la ioh da ka North Liberty Higher Secondary School ba la mihkhmat da ka Deigracia Dan haka jingiakop mareh kaba 100 metre.

Iaka nam ‘Best Team’ naka liang ki kynthei la ioh rah da ka North Liberty Higher Secondary School da kaba khur 17 tylli ki takma ksiar, 9 tylli ki takma rupa bad 3 tylli ki takma rnong bad ba ar ka St. Dominic Higher Secondary School kaba la khur kawei ka takma ksiar, 3 tylli ki takma rupa bad kawei ka takma rnong.

Iaka nam ‘Best Team’ na ka liang ki shynrang la rah da ka North Liberty Higher Secondary School da kaba khur 9 tylli ki takma ksiar, 7 tylli ki takma rupa bad 8 tylli ki takma rnong bad ba ar pat ka Government Boys Higher Secondary School da kaba khur 3 tylli ki takma ksiar, 7 tylli ki takma rupa bad 3 tylli ki takma rnong.

Iaka nam Best Discipline Team la ioh rah da ka Little Flower Higher Secondary School, Ummulong.

Nalor u MLA, la donlang ruh u District Sports Officer (DSO), West Jaintia Hills Ma Khroobok Passah, ki nongialam bad dkhot nongkitkam ka WJDSA, ki Principal, ki nonghikai nalor kiwei kiwei ki riew pawkhmat ka thain.