Pyrshah ka WEESFEPA iaka JHADC ba lilam iaka wah Lakroh

Syllad | The Rising MeghalayaOctober 10, 2024

Ka War East Elaka Satpator Fishing and Environmental Protection Association (WEESFEPA) ka la pynpaw iaka jingpyrshah halor ka jingdie lilam ka Jaintia Hills Autonomous District Council (JHADC) iaka Wah Lakroh.

Ka WEESFEPA ka dei ka seng kaba la thaw da ki shnong kaba kynthup iaka Syndai Pyllun, Muktapur, Amlanai, Lakroh, Hawai Sutnga bad Hawai Bhoi, na ka bynta ban pynneh pynsah ia ki dohum dohwah ki ba don ha ka wah Lakroh namar ba lyngba ki dohum dohpnat kiba don ha kane ka wah ki paid nongshong shnong ki ioh ban leit khwai man ka sngi, ba ki ioh ban bam bad ki ioh ruh ban die ban pyndap ia ka jingdonkam jong ki ha ki ïing ki sem.

La seng ruh iaka na ka bynta ban iada ia kane ka wah ban lait na ka jingpyniap pathar bad jingpyniap dusmon ia ki dohkha dohpnat, da kaba aibih, tongjar bad dat ding.

Ka seng ha u kyrwoh, kala pynpaw ka jingsngewkmen iaka pynpynbna jong ka JHADC katkum ka Letter No. JHADC/MACF/11/2017/2 dated, Jowai, the August 2017, na ka bynta ban pynneh pynsah ia ki dohum dohwah ha ki wahbah wahrit bad kane ka jingpynbna kala ai mynsiem shikatdei eh iaka seng.

Hynrei ka seng ka pynpaw pat ka jingsngew lyngngoh ba mynta u snem ka JHADC ka la khot tender biang ban die lilam ia kine ki dohkha kiba don ha kane ka wah Lakroh, katkum ka Letter No. JHADC/MASF/M/10/2013/236, Dated Jowai, The 25th September, 2024.

Kane ka jingpynbna die lilam ka konsil ia kane ka wah kala wanrah ka jingpyrshah kaba jur na ki shnong bad ka synjuk WEESFEPA namar ba da kaba lilam iaka wah kan pynduh jait iaki dohum dohpnat bad kan ktah ruh iaka jingmyntoi uba bun balang bad myntoi tang wei ar ngut.

Kumta na kaliang ka synjuk kala pynpaw “lada don mano mano ba thied iaka wah, ngi pyrshah ym tang mynta bad nangne shakhmat bad ngim lah ruh ban bah khlieh lada jia eiei iaki.”