Pynum ka jingrwai “Mano ban iam” haka jingiaseng KJP Synod Mihngi ha Nangbah

Syllad | The Rising MeghalayaMarch 20, 2023

Ka jingrwai “Mano ban iam” ka jingrwai choir kaba la rwai da ka Choir jong ka Balang Presbyterian Lumshnong kala pynum bad pynmyllung mynsiem iaki riewngeit ka balang Presbyterian kiba la wan poi sha ka jingiaseng KJP Synod Mihngi kaba 21 kaba long ha Balang Presbyterian Nangbah kaba la poi noh sha kaba kut haka Sngi U Blei.

Ka jingiaseng synod kala sdang naduh ka 17 tarik Lber. Ka phang ka dei “To puh ïaka khyndew shrah jong phi”, Hosia 10:12.

Ka jingiaseng synod ha Nangbah, wat la hap ban pynlong ha iing mane hadien ka jingwan ther jur u slap bad ka jingshah rah ka dara pynkheh jingiaseng haka sngi Saitjain, kam shym la pynduh jingkyrmen ia u paid riewngiet ka balang Presbyterian ban wan tuid sha ka jingiaseng.

Kaba pynmyllung ia u paid nongwan jingiaseng ka dei ka jingrwai choir ka Balang Presbyterian Lumshnong kaba thew iaka jinglong jingman ka Jylla.

Khyllem ka dara jingiaseng synod ha Nongbah

Kane ka sur jingrwai ka phah iaka khubor sha baroh halor ka jingsniew kiba la kynrei haka imlang sahlang ha jylla. Nalor kata ki kmie ki kpa ki iam lynniar naka bynta ki khun kiba im haka sngewbha pyrthei. Kane ka sur jingrwai ka phah iaka khubor ba ka Ri Khasi Jaintia ka donkam ban phai sha U Blei bad ban leh iaka mon U Blei namar ba kine ki sngi ki la jyllei ki kam pop thala.

Haka jingïaseng kaba la long haka por 10.30 baje mynstep ïaka khubor na ka Ktien U Blei la sam da u Rev. HS Dann uba la shim na ka Kitab Isaiah 59:8. Katba haka por shiteng sngi ïaka khubor na ka Ktien jong U Blei la sam da u Rev GPL. Gadew bad ïa baroh ar ki jingïaseng paidbah la pynïaid da u Moderator Elect u Rev CS Laloo.

Haka jingïaseng kaba 10.30 baje la ïoh ïaka jingrwai choir na ka Jingïaseng Samla Balang Lumshnong, Jingïaseng Samla Balang Sutnga, Jingïaseng Samla Moodymmai Wah bad Jingïaseng Samla Balang Thadlaboh.

Haka jingïaseng nohphai sngi la ïoh ka jingrwai choir ba ka Jingïaseng Samla Balang Malki, Jingïaseng samla Balang Shangpung, Jingïaseng Samla Balang Nangbah bad Standing Choir Jingïaseng samla KJP Synod Mihngi.

Haka jingïaseng haka por 6.30 baje janmiet ïaka sobjek Balang “Ka Balang ka Angkor U Blei ba nehden bad ba skhem” Hebru 6:19 la kren da u Rev (Dr) MJ. Hynñiewta bad la ïoh ka jingrwai choir na ka jingïaseng samla Balang Dkhiah bad jingïaseng samla Balang Ratacherra.

Ka jingïaseng Synod kaba Arphew ar kan long haka Balang Pomlakrai.