Pyntip u Myntri ba yn dang slem ka GSWSS-III namar ka jingiakynduh ia bun ki jingeh

Syllad | The Rising MeghalayaApril 25, 2025

Ka skhim sam um Greater Shillong Water Supply Scheme (GSWSS) Phase-III ka la iakynduh ia shibun ki jingeh bad kaba la lam sha ka jingnang pynslem ban lah ban pyndep.

Haba pyntip ia kane haka 24 tarik Iaiong, u Myntri ka Tnad Public Health Engineering (PHE), u Marcuise N Marak u la ong ba ka jingpyntrei ka dang iaid shakhmat na ka bynta ban lah ban pyndep ia ka project.

“Hynrei, kane ka project ka la sahkut noh namar kiba bun ki daw, ha kaba kawei na kine ka long namar ba ka pisa ba la mang na ka bynta kane ka project kam pat biang satia. Na kata ka daw ngi hap ban pynkynriah shuh shuh katto katne ka pisa na ki tyllong bapher bapher bad na kata ka daw ngi la shim por na ka bynta katto katne,” u la ong.

Nalor kata u la bynrap ruh, “Hadien kata haba pyntreikam ia kane ka project ki la mih biang katto katne ki jingeh kiba kynthup halor ka kam jaka puta, ka jingai jingbit na ka Tnad Forest, na ka Cantonment Area bad kiwei kiwei.”

U Myntri u la ong ruh ba haduh mynta ka project ka la iakynduh ia bun ki jingtynjuh. ” Ngi hap ban tih ia ka surok khnang ba ngin ioh ban thep ia ki pipe- kine ki dei ki kam kiba la synniang sha ka jingpynslem ban lah pyndep ia kane ka project,” u la bynrap.

Haba kylli halor ka jingbym don ia ka jingiatreilang hapdeng ka Tnad PHE bad PWD, na ka liang u  Myntri u la ong ba kane ka dei ka kam kaba hap ban pynbeit janai bha.