Pyntip ka Sorkar ba ki don haduh 224 tylli ki polling station ba don jingma ha Rilum Khasi Jaintia

Syllad | The Rising MeghalayaFebruary 20, 2025

Baroh ki don haduh 224 tylli ki polling station kiba don jingma bad kiba lah ban mih ka jingklumar ha kane ka elekshon sha ka Khasi Hills Autonomous District Council (KHADC) bad Jaintia Hills Autonomous District Council (JHADC) ka ban long ha ka 21 tarik Rymphang.

U Commissioner & Secretary ka Tnad District Council Affairs (DCA) u Bah Cyril Diengdoh u pyntip ba na kine ki 224 tylli ki polling station kiba don jingma 129 na ki 1669 tylli ki polling station ki dei kiba don hapoh KHADC bad 95 na ki 477 ha JHADC. Watla katta u la pynthikna halor ka jingpynbiang ia ki bor pahara khnang ba ka jingpynlong ia kane ka elekshon kan long kaba iaid beit iaid ryntih.

U Bah Cyril u la ong, “Ki jingpynkhreh baroh ki la biang lut. Ngi la pynlong buntylli ki jingialang bishar kam bad ki Deputy Commissioner (DC) kiba pyniaid ia ka elekshon. Ki jingpynkhreh halor ki rukom pahara ruh ki la biang lut nadong shadong. Ki DC ki la ithuh ruh ia ki polling station kiba don jingma bad kiba lah ban mih ka jingklumar ha kaba la kham pynkhlain shuh shuh ia ka jingpahara ha ryngkat ka jingiamir jingmut bad ki SP.”

“Na ka liang ki bor pulit ki la sngew skhem namar ka jingpynbiang pura ia ka jingdonkam ia ki bor pahara kynthup ia ki pulit home guards bad kumta kam don satia ka jingduna,” u la ong. “Ki la bishar bniah ia ki polling station kiba don jingma ha kaba kin phah shuh shuh ia ki bor pahara, ” bad bynrap ba la wanrah ia ki bor pahara na kylleng ki jaka jong ka jylla bad namar ka elekshon ka long ha ka Eastern Range, kumta la wanrah bun ki bor pahara na Rilum Garo kaba dei ka Western Range jong ka Jylla.

Nalor kata u Bah Cyril u pyntip ruh ba u Chief Secretary ka Jylla u la pyniaid ruh ia ka jingialang bishar kam ha ryngkat ki Deputy Commissioner.

“U Chief Secretary u la pynlong ruh ka jingleit jurip ia kawei na ki centre kaba kongsan ha Shillong kaba dei ka ISBT, Mawiong kaba phah ia kynhun nongpyniaid elekshon,  ki tiar ki tar bad ruh ka jingniew vote ka ban long ha ka 24 tarik Rymphang,” u la ong.

Haba kylli, u Bah Cyril u la ong, “Ki DC ki la sngew skhem bha. Ki la buh ia ki sector magistrate, sector officer kynthup ia ki sector police officer. Baroh ki la biang lut nadong shadong bad ngi sngew skhem ban ioh ia ka elekshon kaba iaid beit iaid ryntih bad kaba khuid ba suba.”