Pynthikna u CM ban bteng ka NPP ia ka jingiatreilang bad ki paralok synrop ka MDA

Syllad | The Rising MeghalayaNovember 28, 2024

U Myntri Rangbah uba dei ruh u National President ka NPP, u Conrad K Sangma ha ka 27 tarik Naiwieng u la kren shai ba ka NPP kan dang iai bteng ban iatreilang bad ki paralok synrop hapoh ka kynhun MDA na ka bynta ka jingskhem ka sorkar.

Haba kren sha ki lad pathai khubor, u CM u la ong, “Ha kaba iadei bad ka jingdon nombor, ka long kaba shisha ba ngi sngewkmen shibun ba ka NPP mynta ka la don 32 ngut ki MLA bad lehse ka dei tang hadien ka APHLC ba ia une u nombor la ioh biang da ka party. Kumta ngi sngewkmen shibun bad ngi ainguh ia U Blei bad sngewnguh ia ki paidbah halor kane ka jingshaniah kiba ki la ai ha ngi.”

“Ngi la kren shai naduh ka sngi kaba nyngkong ba kum ka party, kum ka kynhun synrop bad kum u Myntri Rangbah ngi don hangne ban phah ia ka khubor kaba sngewtynnad sha ki paidbah ka jylla… Hooid ka kam sain pyrthei kadei kaba kyllain bha bad ki don shibun kiei kiei kiba wan ha ngi hynrei ha kaba kut nga tharai ka khubor jong ka jingskhem bad ka jingshaniah ka long ruh kaba kongsan ha ka sain pyrthei, bad watla ngi la don ia u nombor hynrei ngin iai bteng ban iatreilang bad ki paralok. Ngi la pyni ha ki ia ka jingshaniah bad ki la pyni ha ngi ia ka jingshaniah bad ngi kwah ban iohi ba ngin iatreilang na ka bynta ka jingskhem ha ka synshar khadar bad ka jingkiew ha ka roi ka par ha ka jylla,” u la ong.

“Hooid, ki lah ban don ki jingeh jingtynjuh hapoh ka kynhun synrop. Ki lah ban mih ki jingsngew iapher jingmut hapdeng ki seng sain pyrthei, ngi lah ban ym ia mynjur halor kiba bun ki bynta kiba ngi kwah ban leh, hynrei kane ka dei ka rukom long ha ka kynhun synrop bad ka kam sain pyrthei, hynrei ha kaba kut kaei kaba ngi ia mynjur ka long ba ngi dei ban iatreilang da ka jingkut jingmut kaba skhem na ka bynta ka roi ka par jong ka Jylla. Nga kwah ban pynpaw biang sa shisien ba ka jingkyrshan ba pura jong ngi kumjuh ka jingshaniah ba pura jong ngi, ka jingkylli jong ka jingpynbeit thymmai kam don bad baroh ki paralok ki don ryngkat bad ngi bad ngin dang iai bteng ban iatreilang,” bynrap u Conrad.

Nalor kata u CM u la ong ba baroh ki MLA ka NPP ki la sngewkmen shibun halor ka result bad kam shym la don satia ka jingpynbor ia u ban kyntiew ia ka jingdon ki Mynri sorkar na ka party.

Haba ai khublei ia ki paidbah ka Gambegre halor ka jingkyrshan bad ka jingshaniah ha kane ka elekshon shiteng samoi kaba dang shu dep, u Conrad u la ong, “Kane ka constituency lehse ka dei kawei na ki constituency kaba pynshem jingeh bha ia ngi khamtam hapoh Rilum Garo namar ha kine ki saw tylli ki elekshon ba la dep ngim pat ju jop na kane ka constituency bad ngi ju poi beit ha ka kyrdan kaba lai.”

“Ka dei shisha ka elekshon kaba jwat bha, hynrei nga sngewnguh ia baroh halor ka jingkyrshan bad ka jingtrei borbah kaba pynlong ia ngi ba ngin ioh ia ka jingjop ha kane ka elekshon,” u la bynrap.