Pynsngewthuh paidbah ka MSRLS bad ka Thomas Jones Synod College iaka rukom kynshew bad pynlut pisa

Syllad | The Rising MeghalayaMay 10, 2023

Ka Meghalaya State Rural Livelihood Society (MSRLS), DMMU, West Jaintia Hills District ryngkat ka jingiatreilang ka tnad Economics jong ka Thomas Jones Synod College, Jowai haka sngi Balang kila pynlong iaka “Financial Literacy Campaign for Promoting Digital Finance” ne ka jingpynsngewthuh paidbah halor ban kynshew bad pynlut pisa bad ban pynshlur ban pyndonkam iaki kor ki bor ne technology mynta.

Ia kane ka prokram la pynlong ha Moomulang Moobynna Point, Ïalong.

Ka Kong R. Dkhar nonghikai Thomas Jones Synod College haka jingkren lamkhmat ka la ong, ka jingthmu jong kane ka jingïalang ka long ban pynshai ïaki nongshong shnong ban pyndonkam ïaki kor ki bor kajuh stad mynta haka liang ka pisa tyngka namar bun napdeng ki nongshong shnong ki duna ka jingtip shaphang ka jingkynshew pisa ban pynlut, shim ram bad ka buit ban pyndonkam iaka pisa nalor ban mang na ka bynta kano kano ka kam.

Nalor kata, kane ka prokram ka long ruh kum shibynta ka jinghikai iaki samla pule ba kin ïoh ka jingtip kaba shabar jong ka kamra klas bad la pynshlur iaki ban shim bynta hakum kine ki rynsan kiba ïadei bad kane ka phang.

Ki riew shemphang kiba la wan ban ai jingbatai ki long u D Pohtam NRLM bad u A Pyrtuh Branch Manager MRB kiba la batai bniah halor kumno ban pyndonkam iaka pisa anna, ban dap biang ka ïoh ka kot shimet, ka jingnang ban kynshew bad ban sngewthuh kumno ban pyndonkam ïaki jingdonkam ïalade.

Kine ki riew shemphang ki la batai ruh halor ka jingmyntoi ba ki ïoh na ki Bank bad kyntu ïaki nongshong shnong ban plie iaka account ban poi sha ka thong katkum ka jingthmu jong ka sorkar India ba la tip kum kata ka Digital India.

Ïaka jingïalang la pynïaid da ka nonghikai jong ka Thomas Jones Synod College ka Kong CD Tongper haka jingdonlang ki nongshong shnong ka Ïalong, ki samla pule bad ki nonghikai ka kolej. La iadonlang ruh ka Kong L Lytan, vice principal ka kolej bad kiwei kiwei.