Pynshlur u Conrad ban shna jingbam jingdih naki mar rep

Syllad | The Rising MeghalayaFebruary 5, 2019

SHILLONG:  Ban plie ïaki lad ki lynti ban kamai jakpoh ïaki samla bym donkam donjam, ka tnat Directorate of Food Processing ha ka jingïatreilang bad Meghalaya Institute of Entrepreneurship (MIE) bad ka Meghalaya Basin Management Agency (MBMA) ka la pynlong ïa ka workshop ne ka jingai jinghikai ba ar sngi lynter halor ka phang Food Processing Opportunities in Meghalaya ne ka ki lad ki kabu ha ka kam shna mar na ki soh ki pai ha State Convention Centre in Shillong.

Haba kren ha ka sngi plie ia kane ka workshop, u Chief Minister U Conrad Sangma u la kyntu ïa ki samla ban shim ia kane ka lad ka kabu ha phang food processing bad ula ong ba ki bam ki dih kiba la tylliat ki long tang 10 percent na ka baroh ka jingmih naka rep ka riang; te kumta donkam ban pynkhlain bad pyniar ïaka phang khnang kyntiew ïa ka ïoh ka kot ki nongrep bad kumjuh ïa ki briew kiba thaw ia ki karkhana ban tylliat ïa ki mar rep ne pynwandur ïa ki sha ka dur ki umsoh bad kiwei kiwei de.

U Conrad u la ïathuh ba ka jylla ka ïasam pud kaba 440 KM bad ka Bangladesh, kumta kan plie lad lynti ïaka jylla ban die ïa ki mar ki mata jong ka sha ki Ri ba marjan.

U  Agriculture Production Commissioner, U KN Kumar u la ïathuh ba katkum ka kaiphod jong ka Ministry of Food Processing Industries ka jingmih na ka karkhana Food Processing kan kot ïa ka T. 3.45 Lakh Klur ha u snem 2020 te kumta donkam ban pynshlur ïa ki khun samla ban shim ïa ki skim bapher bapher na ka sorkar ban thaw ki karkhana food processing.