Pynshai ka NEST (I) bym pat phah ia ka DPR sha ka sorkar pdeng halor ka kam tih Uranium

Syllad | The Rising MeghalayaMarch 9, 2024

Ka North East Sunshine Trust (India) ha ka 9 tarik Lber ka la kam ba ka shithi kaba iadei bad ka jingtyrwa ban sdang biang ia ka kam tih Uranium ha Meghalaya ka dei tang kaba la pynkhreh ne draft hynrei ia kaba ym pat shym la phah satia sha u Dr Jitendra Singh uba dei u Myntri Khynnah ka Tnat Atomic Energy ka Sorkar India.

Kane ka jingpynshai ka la wan long shi sngi hadien ba kane ka shithi ka la saphriang lyngba ki social media bad kaba la wanrah ka jingpynrem kaba jur na ki kynhun pyrshah tih Uranium bapher bapher ha ka jylla.

“Sngewbha pule ia ka shithi jong ngi kaba ha ka 26 tarik Rymphang 2024 kaba thoh sha u  Dr Jitendra Singh, Myntri Khynnah ka sorkar Pdeng uba khmih ia ka Tnat Atomic Energy. Ka jingthoh ka dang dei tang ha ka rukom ka jingpynkhreh, kata kaba mut tang shibynta jong ka jingiamir jingmut. Ka long kaba sngew bynniaw ba katto katne ki briew ki bym ithuh ki la rai ha la ka jong ka jingstad, bad ka seng jong ngi ka la shim ia ka sienjam marwei ha kaba iadei bad kane ka projek bad pyrshang ban pynphriang bad kaba la ktah ia ka seng ka jong ngi,” ong ka kong Elizabeth Matthews Nongbri kaba dei ka founder trustee bad chairperson of NEST (I) ha u kyrwoh ba la phah sha ka Shillong Press Club (SPC).

“Ngi sngewthuh katno ka heh kane ka project bad ka jinglong kongsan bad kane ka donkam ban iaid lyngba ka sorkar Jylla bad ki bynta ba pher. Ngi pynthikna ba kane ka shithi ka dang dei dang ka draft bad ia kaba ym pat shym la phah satia sha utei u Myntri ka sorkar pdeng,” ka la ong ruh ba na ka liang ka Seng ka pynpaw ia ka jingbabe lada kane ka la ktah ia ka jingsngew jong u paidbah babun Balang.”