Pynrem ka JSU iaka jingkam u Himanta ba ka Mukroh ka hap ha Assam

Syllad | The Rising MeghalayaMarch 13, 2023

Ka Jaintia Students’ Union kala pynrem jur ia Himanta Biswa Sarma u Myntri Rangbah ka Assam uba la kam ba ka Mukroh ka hap ha Assam haka sngi Nyngkong.

U Himanta ula ong ia kane hapoh ka iing dorbar thawain ka Assam bad kane ka jingkam jong u kala pynbitar iaka JSU khamtam iaki nongshong shnong ka shnong Mukroh bad ki pait ka bri u Hynñiewtrep hi baroh kawei.

Ka JSU kala ong ba u Myntri Rangbah ka jylla Assam ba umdei ban kren laplah bad shu kam ei iaki shnong. Ka la ong ruh ba kane ka jingkren u Himanta ka ai ding shuh shuh bad kan sa wanrah iaka jingiapher bad kan ktah iaka shongsuk shongsain ha khappud.

“U Himanta Biswa Sarma u dei ban tip shai ba ka shnong Mukroh ka hap hapoh ka jingpeit jingkhmih ka JHADC, ym kumba kam myntri rangbah ka Assam ba katei ka jaka ka hap hapoh West Karbi Anglong District,” la ong ka JSU.