Pynrem ka HNLC ïa u Sen & u Lat halor ka jingbymsngewkhia ïaka kam thombor ki pulit Assam

Syllad | The Rising MeghalayaFebruary 22, 2019

JOWAI: Ka Hynniewtrep National Liberation Council (HNLC) ka la pynrem jur ia Nongbishar ka High Court u Justice S R Sen bad u Lat ka jylla ki bym pynpaw ia ka jingsngewkhia halor ka jingshah thombor ki Khasi haki pulit Assam lehse ba kim dei na ka Niam Hindu bad kam don jingktah eiei ia ki Hindu ha Umwali ne ia ka jingiakajia khappud hapdeng ka Assam-Meghalaya.

Ha ka kyrwoh sha ki lad pathai khubor, u Sainkupr Nongtraw u General Secretary bathymmai jong ka Seng HNLC ula ong ba u Sen ula kynthoh halor ka CAB bad u Lat pat u pynpaw jingsngewkhia halor ka jingjia ha Pulmawa Kashmir, hynrei ngim iohi ba kine ki briew kin sngewkhia halor u pud u sam ka Meghalaya haba ki pulit Assam ki thombor iaki paradoh parasnam jongngi

Halor ka jingpynrem da ka Ri India bad ki 40 tylli kiwei ki Ri haba iadei ba ka jingjia ha Pulmawa, Kashmir, u la ong ba kaba sngewsih ka long ba ym don ba kren eiei pat halor ki kam pyntriem jong ki Shipai India jan man la ka sngi pyrshah iaki Kashmiri kaba kynthup naduh ka jingpyniap pathar (genocide),  ka jingdon ki jingtep briew daki hajar (mass graves), bad da ki phew ngut ki jingshah leh beiijot ki kynthei (Mass rapes) kiba dang iaibteng.

U Bah Sainkupar u la pynkynmaw ia ka jingphla jong u Chief Minister barim ka Assam u Tarun Gogoi uba la kynnoh ba ka Sorkar India kaba pynbor iaka Sorkar Jylla ban shim iaka lynti jong ki jing pyniap ba jarjar (secret killings).

U General Secretary ka HNLC ula buh jingkylli balei ba na ka por sha ka por ka Sorkar jylla ka dan donkam ban buh kyndon ia ki ba ki dei ban wan pyndem shuwa ki tiar siat nangta sa iakren bad kane ka dei tang ka kam biej.

Ula ong ba ka Seng ka pdiang ia u General Secretary ka HNLC uba la shongthait kum Ksiang ban iakren ne kan thung da uno uno u briew uba ma ka ka ibit khnang ba kin iohi iaka jingshai jong ka sngi