Pynrem jur u CM ia ka jingkynthoh u nongialam Congress u Pitroda ia ki nong North East

Syllad | The Rising MeghalayaMay 9, 2024

U Myntri Rangbah ka Jylla u Conrad K Sangma u la pynrem jur ia ka jingkynthoh bein jaidbynriew jong u nongialam ba la rangbah ka seng Congress u Sam Pitroda pyrshah ia ki nongshong shnong ka thain Shatei Lammihngi (North East) da kaba ong ba ki iasyriem bad ki nong China.

“Kaba kum kane ka jingkynthoh kaba mih na u nongialam ba rangbah Congress u Sam Pitroda ka long da shisha kaba sngew bynniaw jur bad ka la ktah shisha ia ka jingsngew jong ki paidbah ka thain North East bad kumjuh ruh ia ki nongshong shnong jong kiwei pat ki bynta jong ka Ri.” ong u Conrad haka sngi Balang.

“Kum u nongshong shnong jong ka thain North East, ngi la iohi bad mad ha ki snem kiba la leit noh, ha ki phew snem ha kaba ki la mih bunjait ki jingkren bein ia ki briew kiba dei na kane ka thain North East bad ngi la kyrmen ba ngi la lait noh na kane, hynrei haba ngi iohsngew ia ka jingkren jong u nongialam ba la rim ka Congress ia kiba kum kine ki jingkren ibein bad pynjah burom ka la ktah jur bad pynmong shisha ia ka jingsngew ki briew ki jong ngi, kata kam phet la ki mut ne thew kumno kumno ruh khamtam ia kiba kum kine ki jingkynthoh ki bym pynsngewtynnad ia ki nongshong shnong jong ka ri,” u la bynrap.

Nalor kata haba pynkynmaw ia une u nongialam Congress ba ka India ka dei ka Ri kaba don bun bah ki kynhun jaidbynriew, u Conrad u la ong, “Ka nongrim jong kane ka ri ka dei kaba la pynshong ha ka jingdon ia bun jait ki kynhun jaidbynriew, kata la ka dei ha ka liang ka kolshor, ka ktien ka thylliej, ka jinglong ha ka durkhmat, kane ka dei kaba pynlong ia ka India kumba ka long, hynrei haba phi sdang ban kren bein kane ka long pyrshah ia ka jingmut jong ka India hi. Kumta Nga sngew ktah jur bad ngi pynrem jur ia kum kane ka jingkren kynthoh kaba mih na une u nongialam ka seng Congress.

Ha kaba iadei bad ka rai jong ka Congress ban pynjngai ia lade na kine ki jingkren kynthoh jong u Pitroda, u Conrad u la ong, “Ka Congress party ka la pynjngai ia lade na kane ka jingkren kynthoh, hynrei jin lada une u briew uba rit, u nongialam, u dkhot lehse ka lah ban pynjngai ia lade na kane ka jingkynthoh, hynrei hangne ngi iakren shaphang u nongialam ba la rangbah bha ha ka party, u dkhot uba la iatreilang bad u Myntri Rangbahduh ka Ri bad uba la don bynta bad ka sorkar ha ki snem kiba la leit noh, u briew uba ha katei ka kyrdan ban pynmih ia kiba kum kitei ki jingkren ka mut ruh ba ka dei ka nongrim jong ka seng Congress halor ki katto katne ki mat.

Haba kylli, u Sangma u la ong, “Hooid kumba nga la pynpaw ha ki por kiba la leit noh  ba ka India ka dei ka Ri kaba don ia ki kynhun jaitbynriew bapher bapher bad ngi la iohi ia kiba buntylli ki jingjia ha ki por kiba la dep ha kaba ki briew jong kane ka thain North East ki la ngat ha kiba kum kine ki jingshah kren bein bad kiba kum kine ki jingkren kynthoh kiba la ktah jur ia ka jingsngew.”

“Kumta ruh haba kine ki jingkren bein ki nih na u nongialam ba rangbah ka Congress, ka la kham ktah jur shuh shuh bad kumba Nga ong, kane kam don satia ha kata ka lynti kaba pyrshang ban wanrah ia ka jingialong kawei hapoh ka Ri.Kumta ngi sngewsih jur halor kane bad ngi pynrem ia kane ka jingkren jong une u nongialam ka seng Congress,” ong shuh shuh u Conrad Sangma.