Pynrem jur ki nong Nartiang halor ka jingshah kawang petrol bom ka iing jong u Dy CM

Syllad | The Rising MeghalayaApril 27, 2024

Na ka liang ki paidbah nongshong shnong ka Nartiang Constituency haka 27 tarik Iaiong, ki la pynrem jur ha kaba iadei bad ka jingjia shah kawang petrol bom ka iing jong u Symbud Myntri Rangbah ka Jylla uba khmih ia ka Tnat Urban Affairs u Sniawbhalang Dhar ha ki runar ki bym lah satia ban ithuh ha Nongmensong, Shillong.

Haba kren sha ki lad pathai khubor, u Rangbah Shnong jong ka shnong Sohphoh u Mutshwa Thabah u la ong, “Ngi pynrem jur halor kane ka kam thombor ha kaba la iohi ruh ba ka dei ka jingthmu pyrshah ia ka jingim jong une u MLA ka thain uba dei ruh u Symbud Myntri Rangbah ka Jylla.”

“Kane ka kam thombor kam dei kaei kaei ruh hynrei ka dei ka jingshun pyrshah ia une u MLA ka thain, bad kane ka jingjia ka la ktah jur ia ka jingsngew jong ki paidbah nongshong shnong jong ka Nartiang constituency,” u la bynrap.

“Kumta ngi pynrem jur halor kane ka jingjia bad ngi dawa na ki pulit ba kin thwet ia ki runar kiba donkti bad pynngat ia ki ha ki kyndon ain,” ong utei u Rangbah Shnong.