Pynrem jur bad dawa pynshitom ka UDP ia ki BSF ba thombor ia u ophisar ka tnat Veterinary

Syllad | The Rising MeghalayaFebruary 13, 2024

Ka Seng United Democratic Party (UDP) haka sngi Nyngkong ka la pynrem jur ia ka kam thombor jong ki shipai BSF pyrshah ia u ophisar ka Tnat Animal Husbandry and Veterinary bad dawa ban pynshitom ia ki shipai kiba donkti.

Na ka liang u General Secretary ka UDP u Bah Jemino Mawthoh u la ong ba ka Seng ka pynrem jur ia kane ka kam thombor jong ki BSF pyrshah ia u heh sorkar kaba la jia ha ka 11 tarik mynta u bnai hapoh ka shnong Muktapur kaba hap hapoh Amlarem Block, West Jaintia Hills.

U la ong ruh ba hadien ba kane ka khubor ka la saphriang lyngba ki social media, la sakhi ia une u ophisar uba la shah leh tohmet bad shah pynbor ban law lyngkhuit. Nalor kata uwei na kine ki BSF u la byrthen ruh ban rah ia u sha Zero Point ha ki bynta khappud ka India-Bangladesh bad ban siat iap ia u.

“Kane ka kam bymman jong ki BSF kiba dei ban ai jingiada ha ki bynta khappud ka la pynthohbria ia kane ka tnat shipai hi baroh kawei. Kaba kum kane ka jingleh bymman da ki shipai BSF ka dei ka jingjia ka bym lah ban pdiang da lei lei ruh,” ong shuh shuh u Bah Mawthoh.

Nalor kata une u heh UDP u la ong ruh ba ka party kan ym shim sting halor kane ka jingjia hynrei kan rah bad leit pynsngew ia kane ka jingjia sha u Director General ka BSF bad ka BSF Vigilance Department na ka bynta ban pynlong ka jingtohkit halor kane ka jingjia bad ban shim ka jingpynshitom ia kito ki shipai kiba donkti ban thombor ia utei u ophisar ka sorkar jylla.

Shuh shuh u la ong ba kum kine ki jingjia ha ka jingshisha ki dei kiba lah ban kiar khnang ban pynioh ia ka jingshaniah na ki paid nongshong shnong ka thain khappud bad ba ki bor shipai ki dei ban shim ia ki sienjam ban kiar ban pynmih kino kino ki jingiakajia ha kaba iadei bad ki nongshong shnong kiba shong ba sah ha ki thain khappud.