Pynpra ka Assam iaka signboard ha Maikhuli
U MLA ka Jirang Constituency, u Bah Sosthenes Sohtun kum u nongmihkhmat paidbah ula pyntip syndon sha u Myntri rangbah ka jylla halor ka jingwan pynpra ka Assam ia ka signboard jong ka pung Dohkha ha Maikhuli bad ruh ka jingwan khang ki Pulit Assam ban pyntrei ia ka Project ka tnad Water Resource ha ka shnong Hawla ba hap ha ki jaka khappud ka Meghalaya bad Assam.
Na ka liang u MLA ka jirang, u Bah Sosthenes Sohtun u la pyntip ruh sha u Myntri rangbah, u Conrad K Sangma bad ba la bthah ruh ia u DC bad SP ka Ri Bhoi ban leit jurip ia kitei ki jaka.
U MLA ka Jirang ula jurip ruh iaka shnong Hawla bad Maikhuli haka sngi Saitjain bad ka Sngi u Blei.
“Ka project ha ka shnong Hawla ka dei kaba pyntrei da ka tnad Water Resource na Ri Bhoi bad ka Pung dohkha ba la wan pynpra ia ka signboard ka dei kaba pyntrei lyngba ka skhim MGNREGS haka shnong Maikhuli,” la ong u MLA ka thain.
U Bah Sosthenes Sohtun u la pynrem jur ia ki kitei ki kam thombor ka Assam ha kaba wat la ki la tip ba ka jingiapynbeit pud hapdeng ka Assam bad ka Meghalaya ka dang iaid shaphrang.
U la ong ba ula dep pyntip sha u Myntri Rangbah ka Jylla ba un shim khia ban ia kren bad ka sorkar Assam bad ha kajuh ka por ruh u la dep ban bthah ia u SP bad DC ka Ri Bhoi ba kin phah ia ki bor magistrate bad bor pulit ban leit jurip bad kumba la ia kren u DC ka Kamrup u la kular ban phah shna biang ia ka signboard ha Maikhuli bad u la bthah pat ia ka Bor district ba kin phah shna biang da ka ophis u BDO ka Umling khnang ban pynskhem ia ka jinglong trai ia katei ka jaka ha Maikhuli.

Leave a Reply