Pynpaw u Dy CM ba ka Meghalaya kala sakhi iaka jinghiar ka jingbym ioh kam haki 7 snem ba la dep

Syllad | The Rising MeghalayaAugust 28, 2024

U Symbud Myntri Rangbah ka Jylla u Bah Prestone Tynsong ha ka 27 tarik Nailar, u la ong ba ha kine ki hynniew snem kiba la leit noh, kata 2017-224 ka jingdon jong ki bym ioh kam ioh jam ha Meghalaya ka pyni ba ka la hiar bha, kata kaba sdang na ka 8.8% ha u 2017-2018 bad shaduh ka 1.9% ha u 2021-22.

Ia kane u Myntri u la pynpaw katkum ka jingioh jingkhein ba la lum da ka Centre for Monitoring of Indian Economy.

Haba jubab ia ka special motion ba la wanrah da u MLA ka UDP u Bah Lahkmen Rymbui hapoh ka Iingdorbar, u Bah Prestone ula ong ba ka jingdon jong ki briew ki bym don kam don jam ha ka Jylla ka kot 3.9% katba ha India ka long haduh 7%. Kumjuh ruh, ka jingkhein bala lum da ka PLFS ia ka Meghalaya ka pyni ia ka jingneh kumjuh ka jingdon ki briew kiba khlem kam khlem jam da 2.92% haba nujor bad ka national average kaba kot 4.7% hapdeng kine ki juh ki snem.

“Ka jingdon jong ki briew kiba khlem kam khlem jam ha ka jylla Meghalaya ka kham duna haba ia nujor bad ka national average, kata katkum kine ki artylli ki jinglum jingkhein.Ki jingioh jingkhein ki pyni ba ka iew aikam ai jam ha Meghalaya ka kham biang shuh shuh bad kham khlain ban thaw ia ki lad aikam haba ianujor bad ka jinglong jingman hapoh ka ri,” u la ong.

Haba kdew halor ki sienjam bapher bapher ba la shim da ka sorkar ban weng ia ki jingeh halor ka ioh kam ioh jam, u Bah Prestone u la ong ba na ka liang ka sorkar kadon ia ka thong ban pynmih sa kumba 5 lak tylli ki kam kat haduh u snem 2028.

U la ong ba 2.3 lak na kine ki kabu kin wan lyngba ka rep ka riang bad kiwei ki jait kam kiba don jingiadei bad kane ka bynta, kat yn bud da ki kam khaii pateng, ki hotel, bad transport ia kaba la khmih lynti ba kin ai kam ia haduh kumba 1.5 lak ngut ki briew.

Kumjuh ha ki kam tei jingtei bad pynmih ia ki mar ki mata kin ai kam ia haduh kumba 53,000 bad 23,000 ngut. Katba ha ka kam mining bad kam pynmih bording kin aikam ia kumba 7500 ngut katba ha ki real estate haduh 2500 ngut.

Nalor kata u pyntip ruh ba haduh mynta ka sorkar ka la bei haduh T. 7 klur ha ka Skill Meghalaya Programme. Katba la khmih lynti ba ka jingioh kamai ba shisien shi snem da ki briew kiba ioh jingmyntoi kan kot haduh T.37 klur shi snem.

U la bynrap ruh ba ka sorkar ka la mang haduh T.53 klur kum ka bai aijinghikai bad T.31 klur na ka bynta ki jingdonkam ban aijinghikai sha kumba 26000 ngut kiwei pat ki nongioh jingmyntoi hapdeng u snem 2024-2025. U la ong ba ka sorkar ka la pyrshang ruh katba lah ban thaw ia ki lad aikam ai jam ha ka jylla bad ban shim ia ki sienjam halor ka jingeh ha ka liang ka ioh kam ioh jam.

“Ngi kwah ban pynthikna sha phi ba ka sorkar jong ngi ka trei shitom ban kyntiew bad tei ia ka jylla Meghalaya bad ngi donkam ia ka jingiashim bynta bad ka jingkyrshan lang jong iwei pa iwei ki nongshong shnong halor kane ka bynta,” u la ong.

Haba pynpaw ba ka sorkar Meghalaya da lade hi ka dei ka nongpynmih ia ki lad ioh kam ioh jam ha ka jylla, u Symbud Myntri Rangbah u la ong ba katkum ka khanasamari jng ki nongtrei sorkar ha u snem 2022, ka jingdon jong baroh ki nongtrei hapoh ki tnad sorkar Jylla kat haduh ka 31 tarik Lber 2022 ka long haduh 60,836 ngut.

Nalor kata u la pyntip ba ka sorkar ka la pyntreikam ia ka SOP ha ka por kaba biang halor ki jingpynbna laitkam bad ka jingpynlong ia ki eksam thungkam. Baroh ki don haduh 954 bad 92 ngut ki candidates ba la phah kyrteng da ka MPSC bad DSC naduh u bnai Iaiong 2021.

Shuh shuh hapoh ka central recruitment board, u la ong ba 996 tylli ki kam kiba lait ha ki kyrdan bapher bapher hapoh ka tnad pulit la dep ban thung ha u snem 2023 bad kumba 3000 tylli ki kam kiba lait yn sa thung mynta u 2024. Ka Meghalaya Medical Recruitment Board kala lah ban pyndap haduh 455 ki post ha ki kam ba lait kynthup ia 103 ngut ki doktor specialist bad kumba 164 tylli kam nos bad 78 ki ANM yn sa thung briew noh shen.