Pynpaw pyrshah ka jingialang ka HDBRF bad ki Khlieh Nongsynshar ba leh klet ka sorkar ia ka thain Block I Block II
Ka jingialang hapdeng ka kynhun Hynniewtrep Border Dispute Redressal Forum (HBDRF), bad ki Khlieh Nongsynshar bad ki Sengbhalang ki la pynpaw ia ka jingpyrshah kaba jur halor ki sienjam ba la shim da ka sorkar jylla na ka bynta ban ia pynbeit shwa ia ki kam iakajia pud ha ka thain Psiar – Khanduli sector bad ban leh klet halor ki sienjam ban pynthikna na ka bynta ka jingpynphai pat ia ka thain Block I Block II shapoh Meghalaya.
Haba kren sha ki lad pathai khubor hadien ka jingialang kaba la long ha sor Jowai, u nongaiktien ka HBDRF u Bah Thomas Passah u la ong, “Ngi la rai ban iatreilang kum kawei ka kynhun, kawei ka sur bad kawei ka mat (agenda) khnang ban pynthikna na ka bynta ban pynphai pat ia ka thain Block I bad Block II shapoh Meghalaya”.
“Ngi la rai ban kyntait mardor halor kano kano ka jingpyrshang jong ka regional committee ne ka sorkar jylla ban pynbeit shwa tang ha kaba iadei bad ka Psiar-Khanduli sector,” u la ong da kaba bynrap ruh ba ka nongrim kaba ki ieng ka long kaba shai ba dei ban iakren bniah halor ka thain Block I Block II namar ka Psiar bad ka Khanduli ruh ki dei ka bynta jong ka thain Block I.”
Nalor kata u nongaiktien ka HBDRF u la ong ruh ba katkum ki jingtip ba la ioh ka la don ka jingpyrshang na ka sorkar jylla ban iakren shwa halor ka mat kaba iadei tang bad ka Psiar bad Khanduli, bad lada ka long kaba shisha ki kwah ban pynpaw shai sha ka sorkar ba ki ieng pyrshah jur ia kane bad kin ym kyrshan satia ia kiba kum kine ki rai ba la shim da ka sorkar.
Shuh shuh u Bah Passah uba dei ruh u Working President ka KHNAM, ula ong ruh ba ki Daloi bad ki Rangbah Shnong ka thain kila pyntip ha ka jingialang halor ka jingbym kynthup lang ia ki ha ka regional committee ban iakren ia ka kam khappud hynrei la shu pyndonkam ia ki tang kum ki nongrah shithi ne ‘postmen’ ban wanrah bad pynbiang ia ki kot ki sla.
Ha kajuh ka por ka jingialang ka la shim ruh ia ka rai ban thoh biang sha ka Sorkar Jylla halor ki nongrim ba ka ieng hashuwa ba kin rai ia ka kylla kaba ar jong ka jingiakren pud.Nalor kata u la ong ruh ki paid ka Rilum Jaintia da kawei ka sur ki la dawa ba dei ban pynphai noh ia ka Block I bad Block II shapoh Meghalaya, bad lada u Symbud Myntri Rangbah ka jylla un pynpaw ba kam dei satia ka thain kaba don hapdeng ka jingiakynad, ki kwah ban iohi ia kata lyngba ki kam bad ki don ka jingkyrmen ba ia kane ka jingap khmih lynti kaba laslem jong ki paidbah ka thain Block I bad II yn lah ban weng noh ha kane ka kynti kaba mynta.
Haba jubab ia ka jingkylli u Bah Passah u la maham ruh ba lada ka sorkar ka rai ban pyniaid shwa ia ka jingiakren pynbeit pud tang ha kaba iadei bad ka Psiar bad Khanduli, na ka liang ka jong ki kin hap ban shim da kiwei pat ki lad ki lynti namar lada ka jingiakren mynta kan long tang ia ka Psiar -Khanduli, kata ka mut ba ngin sa duh noh ia kiwei pat ki jaka kiba hap hapoh ka Block I bad ka ban dei ruh ka sngi kaba sngewsih kthang na ka bynta ki paidbah nongshong shnong ka jylla hi baroh kawei.Katkum ka jingpynpaw ka jong u, u la ong ba ki don haduh palat 36 tylli ki shnong kiba hap hapoh ka thain Block-I.
Leave a Reply