Pynngat case ki pulit Meghalaya ia u shit niam Hindu ba pynkhein ia ka jingkyntang ka jaka mane ha Mawlynnong

Syllad | The Rising MeghalayaDecember 27, 2024

Ki pulit ka Jylla ha ka 27 tarik Nohprah ki la register case pyrshah ia u riew shit niam Hindu u Akash Sagar uba dei u nongleh social media namar ka jingpynkhein ia ka jinglong kyntang jong ka iingmane Blei ha ka shnong Mawlynnong, East Khasi Hills.

“Ngi la register case halor kane ka jingjia,” ong u heh pulit ka district u Bah Sylvester Nongtnger uba la bynrap ruh ba ki bor pulit ki la iaid shakhmat ban pynlong ia ka jingtohkit.

Lah ban kdew ba ha ka 26 tarik Nohprah ka nongialam ka Thma U Rangli Juki (TUR) ka Kong Angela Rangad ka la mudui da ka ejahar pyrshah ia uwei u nongleh social media uba la leit rung beain hapoh kawei ka iingmane jong ka Balang Epiphany ha Mawlynnong, East Khasi Hills bad pyrta ia ka kyntien ‘Jai Shree Ram’ da ka jingthmu ban pynmih ia ka jingsngew iapher niam.

Ha kane ka ejahar ba la ujor hapoh Laitumkhrah police station, ka Kong Angela ka la ong, “Dang shen nga la iohi ia ka video ha ka rynsan social media, Facebook bad Instagram ba la pyllait da u Akash Sagar, ha kaba u la leit rung beain hapoh kawei ka iingmane jong ka Balang Epiphany ha Mawlynnong da kaba pynkhein ia ka jinglong kyntang jong ka iingmane da kaba thmu khnang da kaba ieng ha ka pulpit bad pyrta ia ki kyntien bym iadei dur bad ki Balang Khristan bad leh ruh ia ki kam pynjah burom da ki jingrwai kiba long pyrshah Khristan.”

“Kane ka jingleh kaba la sylla khnang ha ryngkat ki arngut kiwei pat kiba la mih paw ha ka video ia kaba la leh da ka jingthmu ban pynmih ia ka jingsngew iapher niam, ban leh ibein ia ka kolshor jong ki rit paid bad ban thaw ia ka kolshor jong ki heh paid kaba dei ka kolshor jong ka jingiashun da kaba pynkhein ia baroh ki kyndon jong ka Riti Synshar Ri halor ka jinglaitluid ha ka jingmane Blei,” ka la bynrap.

Nalor kata ka kong Angela ka la kynnoh ruh ba kane ka video ka la pynmih ia ka jingsyier bad kaba lah ruh ban pynmih ia ka huri hura khamtam hadien ba ia ane ka video la pynsaphriang da ki kynhun kiba kyntiew ia ka niam heh paid bad ia ka jingiashun.

“Kumta tuh Nga kyrpad ia phi ba phin shim mardor  ia ki sienjam kiba tyngeh pyrshah ia kine ki briew kiba donkti ha kane ka kam sniew bad kyntu ruh ia ki rynsan social media ba ki dei ban khang pyrshah ia kine ki video, ki jongshna bad ia ki briew kiba don ha katei ka kynhun kiba pynsaphriang ia kane ka video.Une u briew u dei ruh ban shah pynngat ha ki kyndon ain ba tyngeh bad ban pynthikna ba kum kine ki jingleh kam bymman kiba buh jingma ia ka shongsuk shongsain kim dei ban jia shuh nangne shakhmat,” ong ka nongialam ka TUR ha ka ejajar.

Ha kajuh ka por na ka liang ka Central Puja Committee (CPC) ruh ka la pynrem jur halor kane ka kam beain jong une u riew shimet kaba pynkhein ia ka jinglong kyntang jong ka iingmane Blei ha Mawlynnong bad dawa ruh ban pynlong mardor ia ka jingtohkit kaba bniah bad ban pynshitom batkum ka ain.

Ka CPC lyngba u President u N Bhattacharjee ka la ong, “Ka Meghalaya ka dei ka jylla kaba la tip bha ha ka ri baroh kawei halor ka jingpynneh ia ka jinglong iatylli bad ka suk ka sain hapdeng baroh ki kynhun niam bapher bapher kiba don ha ka jylla, ia kaba ym dei ban ailad ba kan shah ktah lyngba ki jingleh jingkam jong kiba kum kine ki briew shimet ki bym don ka jingkitkhlieh da ka jingthmu ban pynthud ia ka suk ka sain bad ka jingialong shipara hapdeng ki nongshong shnong kiba don ha la ki jong ki jong ki niam bad ki jingngeit bapher bapher.