Pynmih ka tnad Pule Puthi iaka jingbthah kiba dei ban leh bad bym dei ban leh haba shit kyrang ka sngi

Syllad | The Rising MeghalayaApril 27, 2024

Namar ka jingshit kyrang ha ka mariang ha baroh kawei ka Jylla, na ka liang u Director ka Meghalaya, State School Education & Literacy u Swapnil Tembe, IAS u la ai bor ia baroh ki Deputy Commissioner ba kin pynkylla ia ka por long skul lane ban khang shipor ia ki skul ha kito ki jaka kiba la shah ktar jur lada ka long kaba donkam.

U Tembe u la hukum ruh ia baroh ki skul ba kin pynsangeh ia kino kino ki jingleh jingkam lane ki jingialehkai sports kiba shabar lada ki jaka ki dei kiba shah ktah jur ha ka jingshit kyrang lane ha kino kino ki por ba ka jingshit kyrang ka wan syllad na ka bynta ka jingshngain jong ki khynnah skul kumjuh ki nonghikai.

Nalor kata la bthah ruh ba lada don ki jingshitom kiba iadei bad ka jingtyrkhong um ha ka met ne dehydration dei ban pynkit ia ki khynnah sha ki jaka sumar kiba hajan eh.

La hukum ruh ia ki skul ba kin pynthikna ba baroh ki khynnah skul ki dei ban iada na ka jingtyrkhong ha ka met da kaba dih um shiphang shiphang bad ruh ba kin pynkhreh ia ki ORS ne um sohjew lada jia ba don ki khynnah kiba tyrkhong um ha ka met. La kyntu ruh ban pynshlur ia baroh ki khynnah ba ki dei ban wanrah ia ka um dih bad ki.

Kumjuh la bthah ruh ba dei ban kiar na kaba shah ha ka sngi khamtam naduh ka por 12 baje mynsngi haduh ka por 3 baje nohphai sngi, bad dei ban pynshlur ia ki khynnah skul ba kin phong tupia ne pyndonkam ia ki shatri haba ki wan sha skul kumjuh hadien ba la wai skul.

La bthah ruh ba dei ban pynthikna ba ki khynnah skul kim dei ban iaid da ki kjat suda hapoh lane ki jaka kiba marjan jong ka skul.

Shuh shuh la kyntu ruh ia ki bor khmih, ki emergency service bad ki nongtrei ka koit ka khiah ba kin ai ka jingiatreilang bad ki skul.

La ai jingmut ruh ba ki skul kin iakren bad ki jaka sumar ba marjan bad ban buh lypa ia ki phone nombor ioh donkam ha kano kano ka por.