Pynman ka Education Committee Seinraij Jowai ya i e sikai kyrpang hajrong ka NEP-2020

Syllad | The Rising MeghalayaDecember 21, 2023

Ka Education Committee iong ka Seinraij Jowai ha ka 21 Kmaichonglad ha yungwalieh ka Loompyrdi Iongpiah da pynman ko ya ka prokram e sikai wa kyrpang ya ki nonghikai chaphang ka NEP-2020.

Ha kani ka Awareness Programme dawan yachimbynta da ki nonghikai na ki skur wapher wa kynthup ya ka Seinraij Higher Secondary School, Jowai, Dulong Secondary School, Jowai, Panaliar Secondary School, Jowai, Dulong UPS SSA, Panliar UPS SSA, Loompyrdi Iongpiah UPS, SSA, Pohmusiang SSA UPS, Chilliangraij SSA UPS, Presbyterian Secondary School, Jowai, Loompyrdi Iongpiah LPS, SSA nalor ki waheh wasian, manbei manpa ka Seinraij.

Ha ka yalang yahkhmat iong kani ka prokram hei pynlai u Juhi Nanghuloo, Chairman Education Committee, Seinraij daioh I ngoohblai ngoohsyiem na ka Wandalan Dkhar katwa u Hercules Toi, President Seinraij Jwai da khana batai u malum mala chaphang ki rukom ioh myntoi ki khynnah dei wa sdang u pynkrehkam ya ka NEP-2020.

U Juhi Nanghuloo hawa klam yahkhmat da pynsniaw u ya ki san tylli ki mat kyrpang iong ka NEP-2020 kiwa kynthup ya ka accessibility, equity, quality, affordability wa ka accountability.

U Dr. Raj Kumar, Principal JNV Rymbai, East Jaintia Hills kam u bru stad bru chemphang iong kani ka prokram da ong wa ka Ri India dalai luti ko katu la le sien wow pynthymme nae pynjanai ya ka National Education Policy. Kawa nyngkong ha u snem 1968 heiwa ha uni u snem da chim ko ka lad ka luti kammon wow kyntu kynrong yei purae puthi deiwa pynchlur ya ki khynnah wow lai skur ki, ha u snem 1986 ka sien wa ar da pynlait jingmut ko wow kyntu kynrong yei purae puthi lyngba I pynkrehkam ya ki kor Computer katwa ha kani ka NEP 2020 da booh thong ko wow kyntu kynrong yei purae puthi iong ki khynnah hawaroh ki liang. 

Chooh chooh da ong u leh kat kam kani ka NEP 2020 ki nonghikai ymtoh ware u pynchong Nongrim ki du kat yei wa ye ki khynnah u ioh ki Mark kiwa heh iwa kyrpang leh emkam u saindur saindar yei man I long iongki liang wanang nadooh I chait I khiah, I sap I ka-it, I akor I burom wa kiwi kiwi.