Pynlong prokram Road Safety Week ka tnat Transport ha Mairang

Syllad | The Rising MeghalayaMarch 30, 2023

Kum shibynta ban pynshai sha ki paidbah nongshongshnong jong ka Eastern West Khasi Hills District halor kiba bun ki jnit ki jnat kiba iadei bad ka kam niah bad shongkali, ka ophis jong u District Transport Officer ka Eastern West Khasi Hills District ka la ioh ban rakhe ia ka Road Safety Week 2023 katkum ka theme ‘Road Safety-Safety to Life’ ha ka prokram ba la pynlong ha kyrpong jong kane ka ophis.

La iashimbynta da ki ophisar jong ki tnat sorkar bapher bapher kiba kynthup ia ka tnat Transport, Police, PWD bad Health nalor ka jingiasakhi lang jong ki nongniahkali kamai bad ki paidbah ka thain.

Haba kyntu ia ki draibar kali kamai kiba la wan sha kane ka prokram ba kin bud pyrkhing ia baroh ki kyndon niah kali ia kiba la buh na ka bynta ka jingshngain jong ki nongshongkali bad ruh kiba iaid ba ieng ha lynti, u Deputy Superintendent of Police ka Eastern West Khasi Hills District, u Bah D. Moksha ha ka jingkren ka jongu u la pynshai ruh halor ki jait jingpynshitom katkum ka ain na ka bynta ki nongniah kali ki bym ju deng ia u seat belt, ki nongniah bike bym ju phong helmet, kiba niah kali ha ka por buaid, kiba pynher stet ia ki kali, kiba kit palat pud bad kumta terter. 

Haba kren na ka liang ka tnat ka koit ka khiah, u Dr. E.S Lakiang ha ka jingkren ka jongu, u la batai shaphang ki katto katne ki bynta jong ka jingsumar First Aid na ka bynta ki lanot aksiden kali hashwa ban rah iaki sha  ki hospital na ka bynta ka jingsumar kaba bniah, katba, u Assistant Executive Engineer ka tnat PWD, u Bah K. Rymbai u la kren halor ki signal ia kiba la buh ha ki surok bad ka jingdonkam ban bud pyrkhing iaki kum shibynta ban khanglad ia ki jingjia aksiden kali kaba wanrah jingma ym tang ia ki nongshongkali hynrei wat ia ki paidbah ba iaid ba ieng ha lynti kumjuh.

Kiwei kiwei pat kiba la kren ha kane ka sngi ki kynthup ia u Sordar ka Shnong Lumsohkhlur, u Bah D. Kharmawlong bad u District Transport Officer ba dei peit ia ka Eastern West Khasi Hills District, u Bah W. Makdoh uba la long u shongknor ba pyniaid ia kane ka jingialang. (SDPRO, Mairang)