Pynlong ka WJBA da ka Boxing Fight Night ban khring sha kam iakura

Syllad | The Rising MeghalayaDecember 18, 2021

Ka West Jaiñtia Boxing Association (WJBA) ryngkat ka jingïatreilang ka ophis u District Sports Officer, West Jaintia ka la pynlong ïaka iakop ïakura paidbah kaba la tip kum ka ‘Boxing Fight Night’ haka miet Thohdieng ha Ïawmusiang, Jowai.

Kane ka dei ka sien kaba ar ba ka WJBA kala pynlong ia kum kane ka jingiakop iakura ha jaka paidbah ban khring iaki samla samhoi ban phai khmat sha ka ialehkai iakura.

U Deputy Commissioner, West Jaintia Hills District U Ma Garod LSN Dykes, IAS ula long kum u kongsan haka jingiadonlang u District Sports Officer (DSO) u Ma Khroobok Passah, ki nongialam bad ki dkhot ka WJBA bad kiwei kiwei.

Ha kane ka rynsan ïa kura la wan ïa shim bynta 16 ngut ki khynnah shynrang bad kynthei.

U Ma Garod haba kren ula ong ka jingpynlong ïa kum kine ki rynsan ka ai mynsiem ïaki samla ialehkai ban im ka jingim kaba long adkar khnang ban lait na ki jingmlien kiba sniew bad ban jop haka jingim ha kano kano ka kam.

Ula kyntu ruh ïaki nongshong shnong ka sor Jowai ki bym pat dep ban ai ïaka tika ïada COVID ba kin ban wan shakhmat ban ai tika haka 20 bad 21 tarik Nohprah 2021 haki jaka ba la pynbeit haki shnong ki jong ki.

Ki lahduh ha kane ka rynsan ïakura ki long u Wandamei, ka Elicia, Baiamutlang, Gracenylla Mary, Ram Lyngdoh, Tredicia bad Rishanlang.