Pynlong jingiakhih ka KHNAM ban dawa pynduh ia ka personal interview ha ka thungkam

Syllad | The Rising MeghalayaAugust 20, 2024

Ka Khun Hynniewtrep National Awakening Movement (KHNAM) ha ka 19 tarik Nailar ka la pynlong da ka jingiakhih shong kyllain mungor ba shi sngi kynthih ha madan Malki ban pynbor ia ka Sorkar Jylla ba dei kan pynduh pyndam noh ia ka personal interview ha ka thungkam sorkar na ka bynta ki Group-B, C bad D.

Haba kren sha ki lad pathai khubor, u Working President ka KHNAM u Bah Thomas Passah ula ong “Lyngba kane ka jingiakhih,ngi dawa jur na ka  Sorkar Jylla ba ka dei ban pynduh noh ia ka personal interview na ka bynta ki kam Sorkar ha ki Grade B, C, D khnang ba ka rukom thungkam thungjam ha ka Jylla kan long da ka lynti kaba khuid ba suba bad kaba lait na ka jingleh shiliang ne jied bahaiing ne kiba don jingiadei bad ki heh ki hain.”

“Ngi la dep ban thoh la bunsien sha ka sorkar Jylla halor ki jingshisha ba ka Sorkar Pdeng bad ki 23 tylli ki Jylla ki la pynduh noh ia ki personal interview naduh u snem 2016, bad ka jingthmu ka long na ka bynta ka jingkhuid ha ka thungkam thungjam bad da kaba pynthikna ba ka dei ban long beit katkum ka jinglah,” u la ong.

U Bah Passah u la ong ba da kaba weng noh ia ka personal interview, kan pynshlur ia ki nongkwah kam ban iakhun ha ki eksam kam bapher bapher.

U la ong ruh, “Kumba ka long mynta, kiba bun ki sngew ba watla ki long kiba tbit ne kiba la nang la stad katno katno ruh, lada kim tip ia ka lynti ne channel ne uno uno uba don ha ka bor, kin ym ioh kam ha ki tnad sorkar bapher bapher. Ka jingpyniaid ia ka personal interview ka pynlong ia ki briew shwa ban apply ia kino kino ki kam ban wad mano ba lah ban iarap ia ki ban ioh ia ki kam. Dei na kata ka daw ba ngi sngew ba lada ka sorkar jylla ka kwah ban pynthikna ia ka jinglong khuid ha ka rukom thung kam, ka dei ban pdiang sngewbha bad mynjur ia ka jingdawa jong ka party.”

“Dang shen ngi la iohi ruh ia kawei na ki seng trei mon sngewbha kaba la iakhih pyrshah ia ka jingkynnoh bamsap ha ka MPSC, namarkata, donkam ban pynkut noh ia ka bamsap da kaba weng bad pynduh pyndam noh ia ka personal interview namar kan long ka jingmyntoi kaba khraw ia ki paidbah ka jylla, ” u la bynrap.