Pynkylla iaka Reservation Policy ne mad iaka jingiakhih ong ka JCCRP

Syllad | The Rising MeghalayaMay 29, 2023

Ka ding jong ka jingdawa ban pynkylla ne pynthymmai noh ia ka Meghalaya State Reservation Policy (MSRP) kaba la 51 snem ka la meh klang sa ha Ri Lum Jaintia haba ki sengbhalang hapoh ka lama jong ka Jaintia Coordination Committee on Reservation Policy (JCCRP) ki la dawa ba dei ban pynkylla noh mardor Reservation Policy ne mad ki jingiakhih kiba jur nangne shakhmat.

Ki sengbhlang ba kynthup ka Jaintia Students’ Movement (JSM), Jaintia Students’ Union (JSU), East Jaintia National Council (EJNC), ka Synjuk Waheh shnong ri Jaintia bad Synjuk Waheh Shnong Jowai hapoh ka lama Jaintia Co-ordination Committee For Reservation Policy (JCCRP) ki la sdang ia jingiakhih da ka sit in demonstration ne shong kyllaiñ myngor ha Stand Taxi Ummulong, Iawmusiang, Jowai haka sngi Nyngkong.

Haba shim bynta ha ka jingialang, u nongïalam ka Kiang Nangbah Government College Students’ Union u Precious Sten ula ong ka Reservation Policy ka jylla ka long kum ka ding kaba thang ïaka lawei jong ki samla pule.

Une u nongïalam ki samla pule ula ong haba peit ïaka jinglong jingman ka pule puthi hapoh ka jylla, teng teng ka wan haka bor jingmut jingpyrkhat jong ki samla ban ong ba ka jingleit pule ïaka kyrdan Degree ka long tang ban lait na ka jingshong ïing.

Shuh shuh ula ong ki kmie ki kpa haba ki phah pule ïaki khun ka jingthmu jong ki, ka long ban ïoh kam ïoh jam bad ban ïoh ki khun ïaka lawei kaba phyrnai, hynrei sngewsih ba kumba long mynta, ym sngew donkam ban pule namar ka bhah thung kam thung jam ka long kaba noh shilliang.

Une u samla pule ula ban jur ïaki 7 ngut ki MLA jong ka ri lum Jaintia ba kidei ban kren eiei halor ka bhah thungkam thungjam ne ka Reservation Policy bad ban dawa na ka sorkar ban bishar bniah ïa kane ka Policy kaba la ktah shisha ïaki khun samla jong ka ri Khasi Jaintia.

Ki nongkren kynthup naduh ki nongïalam sengbhalang, ki nongïalam shnong, ki riew paidbah, ki la ong, ba ha kiwei jylla ki ïa leh katba lah ban review ne pynthymmai man la ka shi phew snem ïaka Reservation Policy katba ha Meghalaya pat la san phew snem kynthih ka ïaneh ïai sah kumjuh.

Ki la kynthoh ruh ïaki MLA Khasi khamtam ki 7 ngut ki MLA ka rilum Jaintia ki bym kren eiei ïa kane ka mat kaba ktah pyrshah ïa u khiewja jong ki paidbah.

Ki la ong ba ka jingsngap jar jong ki nongmihkhmat Khasi ka pynpaw shai ba kim don jingkitlhlieh kum ki nongmihkhmat ba la jied bad pynkhamti ha ki ban trei na ka bynta ka jaidbynriew.

Ki nongkren ki la pynpaw ruh ka jinglyngngoh ba haka por kanbas elekshon ki pyndonkam bakla ïaka kyntien ‘jaidbynriew’ tang ban khring vote, hynrei ynda la jop pat ki sngap jar jar. Shuh shuh kaba kham thamula ka long baka jingkynthup jong ki ïa mat Reservation Policy ha ki manifesto jong ki ka long tang ka kam pynbieij briew bad shukor ïaki paidbah.

Baroh ki nongkren kynthup u nongïalam barim ka JSU u Rikut N. Parien, u President ka Synjuk Waheh ri Jaintia u Army Lipon, u General Secretary ka JSU u Treiborlang Suchen, u president ka JSM u Leningstar Rymbai bad kiwei kiwei ki ai ka jingkyrshan kaba pura ïa u MLA ka Nongkrem u Ardent Miller Basaiawmoit uba la mih shakhmat ban shah thngan na bynta ka lawei jong ki khun samla.