Pynkup helmet ia ki khynnah haba pynshong ar shaka na ka bynta ka jingshngain

Syllad | The Rising MeghalayaOctober 20, 2024

Ka Child Friendly Shillong ha ryngkat ka jingiatreilang bad ka Shillong Traffic Police lem bad ki samla pule ka St. Edmunds College (MSW department), Department of Social Work Martin Luthur Christian University, IIPS, William Carey University (MSW department) bad Women’s College (BSW department) ha ka 18 tarik Risaw ki la pynlong ia ka jingialap halor ka jingkongsan ban pynkup helmet haba kit ia ki khynnah da ki kali ar shaka.

Kane ka prokram ba la pynlong hapoh Don Bosco Square, Dhankheti bad Fire Brigade ka thmu ban pynshai hapdeng ki paidbah halor ka ain kaba iadei bad ka jingdonkam ban kup ia ki helmet bad ba ka ain kam dei tang na ka bynta kiba la heh la san, hynrei wat ia ki khynnah rit ruh ki donkam ban kup ia ki helmet haba shong ar shaka.

Kine ki samla ki la pynshai ruh sha ki paidbah kumno ba ki helmet ki lah ban iada ia ka jingim lada jia kino kino ki jingjia iatyngkhuh kali bad ka dei ruh ka atiar iada kaba kongsan na ka bynta ka jingshngain ha ka leit ka wan lyngba ki ar shaka.

Na ka liang kine ki samla kin bteng ia kane ka jingialap ka jong ki ha la ki jong ki college, university bad ki shnong ki thaw lyngba ki sienjam bapher bapher kum ki jingialap lyngba ki postar, ka jingpynmih ia ki video ban iohi paidbah, lyngba ki rynsan social media bad kiwei kiwei pat ki lad ki lynti.