Pynkup burom ka MEPA ia arngut ki nongpathai khubor ka Jylla kiba ioh pdiang khusnam

Syllad | The Rising MeghalayaJune 20, 2024

Ka Meghalaya Editors’ and Publishers’ Association (MEPA) ha ka 19 tarik Jylliew ka la leh burom ia ar ngut ki nongpathai khubor ka jylla kiba la ioh khusnam ha ka ri India, kata kiba kynthup ia i Kong Alicia Bakor Phanwar bad i Kong Princess Giri Rashir ha ka jingialang ba kyrpang ba la pynlong ha Shillong Club.

Ha kane ka jingleh burom, ka MEPA ka la ai sngewbha ia baroh ar ngut ki nongioh khusnam da ka memento bad ka shithi ai burom.

Lah ban kdew hangne ba i Kong Alicia Bakor Phanwar iba dang 26 snem rta i la ioh ia khusnam ENBA Gold Award for Best News Producer ha ka 30 tarik Lber 2024. I dei iwei na ki nongpathai khubor ba dang khynnah tam iba trei kum ka shift newsroom supervisor ha ka India Today TV.  

Katba I Kong Princess Giri Rashir i la ioh ia ka khusnam Ramnath Goenka Award for Excellence in Journalism ha ka 19 tarik Lber 2024. Mynta I trei kum ka nongai khubor na Meghalaya ia ka East Mojo.

Ia kane ka jingialang leh burom la pyniaid da i-treasurer ka MEPA i Kong Banda Blah, bad la ioh ruh ka jingkren na u general secretary ka MEPA u Bah John W. Thabah, u president Bah R Monarch Shabong, u vice president u Rajib Choudhury bad i adviser Kong Patricia Mukhim.

Ha ka jingkren I Kong Phanwar ia la ai khublei ia ka MEPA namar kane ka jingleh burom ia i. I la ong ruh ba ka Meghalaya ka dei ban ioh jaka ha ki lad pathai khubor jong ka ri India ha kaba iadei bad ki mat bad ki jinglong jingman kiba ka jylla ka don.

Katba I Kong Rashir ha ka jingkren i la pynpaw ka jingsngewnguh ia ka MEPA namar ka jingai burom kyrpang ia ka jingioh khusnam ka jong i. I la ong ruh ba ka dei ka kamram ki nongpathai khubor ka Meghalaya ban sei ia ki mat kiba iadei bad u paidbah ka jylla khnang ba kita ki mat kin poi sha ka jingtip jong ki lad pathai khubor ha ka ri India baroh kawei.