Pynkup burom ka JYF ïa u MDC ka Jowai North

Syllad | The Rising MeghalayaMarch 16, 2019

JOWAI: Ka Jaiñtia Youth Federation (JYF) kala pynkup burom ïa u MDC ka Jowai North, u Brightstar Chyrmang uba long u nongïalam barim ka JYF haka sngi Saitjaiñ ha ophis treikam ka JYF ha Mookyrdup.

U Brightstar Chyrmang shuwa ba un rung sha ka jylli jong ka saiñ hima sima ula bat kum u Working President ka JYF.

Ka JYF kum ka dak ka jingburom ia une nongialam barim uba la trei naka bynta ka bha ka miar ka seng bad imlang ka sahlang kala pynkup burom ïa u bad halor ka jingjop jong u ïaka elekshon MDC.

Haka jingïalang pynkup burom la iadonlang naduh u N. Rymbai, Working President, u OL Tariang Vice-President, u F. Rymbai, General Secretary, u S. Pajuh, Joint Secretary, u  Becareful Chyrmang, Organising Secretary, u John Pala, Education Secretary, President ka KNGCSU bad kiwei de ki riew Rangbah.

Ka JYF ka kitbok kitrwiang ïa u Brightstar Chyrmang uba long mynta u MDC sha ka Ϊing Dorbar thaw aiṅ ka JHADC, ba un ioh ka met ka phad kaba koit ba khiah, ka jingstad bad ka jingshem phang ba un lah ban shakri khambha shuh shuh ïa ka constituency, ka Ri bad ka jaid bynriew hi baroh kawei.

U Brightstar Chyrmang, MDC Jowai North u la pynpaw ia ka jingsngewnguh ia ka JYF bad u la ong ba dei lyngba jong ka JYF ba u la ioh shibun ki jingkyrkhu ha ka jingim jong u khamtam ha kaba sain dur ia ka lawei kum u nongialam na ka bynta ka Ri bad ka jaid bynriew. Ula khot ula wer ia ka JYF ban ïatreilang ryngkat ryngkat na ka bynta ka bha ka miat, ka roi ka par ka imlang ka sahlang bad u la kyntu ruh iaki nongialam ban nang iai shakri kham bha ia ka Ri bad ka jiad bynriew ha ki liang baroh.