Pynkup burom ka Dorbar Shnong Moolamylliang ïaki khynnah kiba pass bha haka SSLC bad HSSLC

Syllad | The Rising MeghalayaSeptember 6, 2021

Ka Dorbar Shnong Moolamylliang lyngba ka Village Education Committee kala pynkup burom ïaki 21 ngut ki samla pule kiba pass bha haka eksam SSLC bad HSSLC haka sngi Saitjain

Ia kane ka jingpynkup burom la pynlong ha Moolamylliang U P School ha kaba u Chairman jong ka Jaintia Hills Autonomous District Council (JHADC) Dr. Sankey Shangpung ula ong kum u kongsan bad iaka jingialang la pyniaid da u Ngeitskhem Syrti  u ba long u Chairman jong ka VEC.

La ioh jingkren pdiang na u Knerlang Pala u ba long u Secretary jong ka VEC, u Damewanhi L Rymbai, Asst Waheh Shnong, Apmon Pachiang, Waheh Shnong bad ka kong Ngeitmon Dkhar ka nonghikai ka Moolamylliang UP School.

Ka bor shnong jong ka Moolamylliang lyngba ka Village Education Committee ryngkat Dorbar Shnong  Moolamylliang  da kawei ka jingmut  kala rai ban pyrshang  ban wad ia ki lad ki lynti ban seng iaka skul Secondary namar ba kane ka shnong haduh mynta kam pat don kawei ruh ka skul haka kyrdan secondary bad kiba bun ki khynnah hadien bala dep pule haka kyrdan UP ki hap ban bteng iaki jingpule sha ki skul ba don marjan bad ka shnong bad sha kiwei kiwei ki jaka.

U Dr Sankey haba kren ula haba sneng ba kraw iaki samla pule ula ong ban jop haka jingim pule puthi kadei ban kiar na ki jingmlien ba sniew. Ka jingpass bha haka SSLC bad ka HSSLC ki dei tang ki mawjam ba nyngkong ba ar bad ban poi sha ka thong haka pule puthi, ula ong Dr Sankey.

Hadien kane ula sam iaki syrnod sha ki samla kiba pass bha bad ula pyllait paidbah ruh iaka kot Curious Brain ka kot ban iarap iaki khynnah ba pynkhreh iaka eksamin SSLC kaba la thoh da u Kamphereiei Pala u nongshong shnong ka Moolamylliang.

U Kamphereiei u dei uba la wan haka Top 10 Position haka HSSLC Science Stream jong ka MBOSE ha u snem 2019.

Hadien bala wai ka prokram la pynlong ruh iaka ka jingthung dieng kaba la iashimbynta ruh da u chairman ka JHADC.