Pynkup burom ka Dorbar Shnong Khliehmushut iaki nongkitkam shnong barim

Syllad | The Rising MeghalayaDecember 31, 2021

Ka Dorbar Shnong Khliehmushut kala pynkup burom iaki nongkitkam shnong barim jong ka shnong Khliehmushut kiba la trei naduh u snem 1994 haduh u snem 2020 haka sngi Thodhieng.

Kane ka jingpynkup burom ka long kum ka dak ban burom iaki nongkitkam shnong barim halor u synñiang u bynhei ba kila noh sha ka imlang ka sahlang.

Ha kane ka jingpynkup burom la iadonlang u ma Coming One Ymbon MLA Raliang, u Waheh shnong ka Khliehmushut Shangpung u Ma Tuesday Lytep nalor kiwei kiwei ki riewrangbah ka shnong.

U Tuesday Lytep ula ong ba ka dorbar shnong Khliehmushut kala shim ia kane ka sienjam ban pynkup burom iaki nongkitkam barim kalong halor ka jingtrei shitrhem jong ki ban trei na ka bynta ka miat ka bha jong ka shnong. “Ka dorbar shnong kam lah khlem da pynpaw iaka jingsngewnguh halor u synñiang ba phi (nongkitkam barim) ba phi la noh sha ka imlang ka sahlang”, la ong u Tuesday.

U Ma H Iakai uwei na nongkitkam barim uba la shah pynkup burom haba jingkren ula ong, ka jingtrei na bynta ka shnong kam mut ba ngi kwah ïa kata ka burom ne khusnam hynrei ka dei na ka bynta ban shakri iaki para briew bad ban miat ban bha ka imlang ka sahlang.

U Ma Comingone Ymbon haba kren kum u kongsan ula ong ba haba sdang ia kino kino ki kam bunsien la shem tang ki jingeh la ka dei ha ka jingtei iaka iing ka sem ne ki kam shnong kam thaw, hynrei tang ka jingïatylli bad kut jingmut kaba lah ban jop ïa kita ki jingeh.  U MLA ula ïaroh ïaka Dorbar Shnong kaba la pynkup burom ïa kine ki nongkitkam shnong barim ka ban ai mynsiem ïa kiwei pat ki dkhot shnong ban kit ïa kane ka kam.

Ula kyntu ruh ïaki nongshong shnong ban shimkhia bad sumar ïa kino kino ki jingmyntoi ba wan lyngba ka sorkar bad ban ïatreilang ha kaban wanrah iaka roi ka par.

Ki Waheh shnong barim kiba la shah pynkup burom ki kynthup ïa u Ma Wantipsngi Rabon uba la bat ïaka kam Waheh shnong naduh u snem 1994 haduh 2000. U Ma Finely Papang 2000-2004, u Ma Raphoi Ïakai 2004-2011 bad u Ma Nidayoo Papang 2011-2020.

Nalor ki Waheh shnong la pynkup burom ruh ïaki 6 ngut ki General Secretary, 21 ngut ki dkhot ka Dorbar Shnong Khliehmushut Shangpung, 10 ngut ki longkmie bad 9 ngut ki rangbah kiba la noh synñiang ban wanrah ïaka roi ka par bad ka bha ka miat hapoh shnong poh thaw.