Pynkhreh lypa ka Sorkar iaka jingwan ka lyuir, mang 20 klur sha ki DC na ka bynta ki lad jingiarap

Syllad | The Rising MeghalayaMay 11, 2024

Shwa ka jingwan jong ka lyiur na ka liang ka Sorkar Jylla ka la pynkhreh lypa ia ki lad jingdonkam khnang ban lah ban tehlakam haba jia ki jingshah pynjulor da kaba mang ruh ia ka song pisa kaba mar T.20 klur sha baroh ki Deputy Commissioner khnang ba kin lah ban iarap ia ki lanot kiba shah ktah ha kino kino ki jingjia shah pynjulor na ki jingjia shlei um, twa khyndew bad kiwei pat.

Na ka liang u Commissioner & Secretary uba khmih ia ka Tnat Revenue bad Disaster Management u Sanjay Goyal ha ka 10 tarik Jymmang, u la khot ia ka jingialang bishar kam halor ka jingpynkhreh jong ka Jylla ia ka jingwan jong ka lyiur.

“Ki sngi bala antad ia ka jingwan jong ka lyiur ha ka Jylla kan long ha ka taiew ba nyngkong jong u bnai Jylliew u ban wan. Ngi la long kiba la pynkhreh na ka bynta kane,” ong u Goyal haba kren sha ki lad pathai khubor hadien ka jingialang jong ka State Level Coordination Committee (SLCC).

Ha kane ka jingialang la wan iashim bynta da ki heh ophisar na ki tnat bapher bapher kaba kynthup na ka Tnat ka Koit ka khiah, PWD, PHE, SRDF, Civil Defence, IMD, Education nalor ki Deputy Commissioner kiba dei khmih halor ki kam aijingiarap ha la ki jong ki district.

“Ka mat ba kongsan jong ka jingiakren ka long ba haduh katno ngi long kiba la pynkhreh ha kaba iadei bad ki lad jingiarap ba donkam kyrkieh. Baroh ki Deputy Commissioner ki la pynlong ia ki jingialang jong ki district level coordination committee ha kaba kin sa shim ia ki sienjam ban pynbiang ia ki jingdonkam lada jia kino kino ki jingshah pynjulor. La kyntu ruh ba kin khmih na ki jingjia kiba ladep bad ban shim ia ki sienjam kiba dei biang,” ong u Goyal.

Da kaba pynpaw  ba ki District level disaster management plans ki la ioh ia ki jingpynshai na ka liang ki Deputy Commissioner, u Goyal u la ong ba kine ki kynthup ruh ia ki resource mapping, ki jingdonkam kiba lah ban ioh ha ka liang ki kor ki bor bad ki tiar ki tar nalor kiwei pat.

“Ka list jong ki nodal ophisar kumba phi tip namar ka ilekshon, ki la mih ki jingkylla ha ki kyrdan bapher bapher ha kaba iadei bad ka jingpynkynriah ia ki ophisar. Kumta la kyntu ba kin aijingtip biang ia ka thup ki Nodal Department haryngkat ki phone nombor khnang ba ki lad aijingtip kin iaid beit iaid ryntih ha baroh ki kyrdan,” u la ong.

Nalor kata u Goyal u la pyntip ruh ba ki Incidents Response Systems ruh ki la treikam biang ha kane ka kynti kaba mynta na ka bynta kino kino ki kam kiba kyrkieh. Haba phai sha ki lad aijingtip, ngi la kyntu ia ki DC ba kin pynkhreh ia ki plan ban ithuh i ki jaka ki bym don ia ki lad aijingtip bad lehse ban shim ia ka jingiarap jong ka Tnat MPRO khnang ban pynthikna ba ki lad aijingtip kin treikam barabor.

Ha kaba iadei bad ki kam aijingiarap, u Goyal u la ong ba haduh jan kumba 20 klur ka pisa la bud bad ki Deputy Commissioner khnang ba kin khmih ha kaba iadei bad ki kam aijingiarap.

 “Nga kwah ban bynrap sa kawei ka kam kumba la shong bishar kam da u Myntri Rangbah, ngi la shem ba ki don katto katne ki jingeh haba phai sha ka jingpyllait ia ka pisa sha ki nongioh jingmyntoi ha ka por ba lyngkot bad mynta ngi la weng ia kane ka jingeh da ka jingaibor shuh shuh ia ki Deputy Commissioner” ula ong shuh shuh.

Shuh shuh u la ong ruh, “Nga sngewkmen shibun ban pyntip sha phi ba ha kine ki jingjia shah lynshop ‘eriong ba dang shen, ngi la lah ban phah ia ki jingiarap pisa sha ki account jong ki nongioh jingmyntoi tang hapdeng ka 24 haduh 48 kynta kaba long da shisha ka jingiarap kaba khraw ia ki paidbah bad ngi la lah ruh ban leit aijingiarap mardor ha ka liang ka bam ka dih, ka jingmaramot ia ki iing ki sem bad kiwei kiwei ki lad jingiarap kiba long katkum ki kyndon jong ka sorkar India.”

Ha kawei pat ka bynta u la ong ba ki la don 7 ngut ki briew kiba la duh ei la ka jingim bad palat 2800 tylli ki longiing ki la shah ktah namar ka jingther u ‘lapbah ha ka Jylla.