Pynkhreh ka MBoSE ban pynlong noh arsien ia ka eksam SSLC naduh u 2025

Syllad | The Rising MeghalayaAugust 9, 2024

Ka kynhun Myntri ka Sorkar Jylla ha ka 9 tarik Nailar ka la ai ka jingmynjur halor ka Amendment jong ka Meghalaya Board of School Education Regulation for Secondary School Leaving Certificate Examination, 2011 ka ban shah ban pynlong noh artylli ki Board eksam ha ka shi snem naduh u snem 2025.

Haba kren sha ki lad pathai khubor hadien katei ka jingialang, u Myntri ka tnad Pule Puthi u Rakkam A Sangma u la ong, “Da kane ka jingshim rai ka MBoSE kan pynlong noh artylli ki Board Eksam ha ka shi snem ka ban sdang naduh u snem 2025 shakhmat.

“Ia ka Board Eksam kaba nyngkong yn pynlong ha u bnai Rymphang lane ha kaba sdang jong u bnai Lber bad ka Board Eksam kaba ar yn pynlong na ka bynta kito kiba shah bat lut ha baroh ki sobjek lane kawei, ar ne lai sobjek. Yn shah ia ki ba kin iakhun ia ka Board Eksam hapoh jong ka shibnai ne ar bnai ei ei, kata kaba mut hapoh jong u bnai Jymmang,” u la ong.

Katkum ka jingpynpaw da u Myntri, kane ka rai jong ka Sorkar Jylla ka dei kaba iaid katkum ka National Education Policy (NEP).

Une u Myntri u la ong ba ia kane ka lah ban kyrshan ia ki khynnah pule namar mynta ka supplementary eksam ki dei kiba ju pynlong hadien shi snem, hynrei mynta ia ka supplementary eksam yn lah ban pynlong noh hapoh u juh u snem khnang ban pyllait na ka jingsepei kaba shi snem na ka bynta khynnah klas X.

Nalor kane u Rakkam u la ong ruh, “Khnang ban tyngkai ia ka por na ka bynta ki khynnah pule ba kin ioh rung klas ha ki snem ban wan, kata la ka long ha u 2025-2026,  ka Board Eksam kaba nyngkong kan long hi ha u bnai Nohrpah, kata lehse ha ka taiew ba lai ne taiew ba saw jong u bnai Nohprah 2025.Ka Board Eksam kaba ar kan long ha u bnai Rymphang lane Lber 2026, hynrei na ka bynta kane ka samoi pule ba mynta u snem yn pynlong ia baroh artylli ki eksam hapoh u bnai Rymphang bad Jymmang.”

Ha kajuh ka por u Myntri u pyntip ruh ba kan ym don don ka optional paper lane best of five naduh ka samoi snem pule jong u 2026-2027.