Pynkhlain ka UDP Jowai iaka tnad ha Phlongingkhaw Madur & Sohmynting

Syllad | The Rising MeghalayaJanuary 10, 2023

Ka United Democratic Party (UDP) Jowai Circle ban pynkhlain iaka party sha ki shnong kiba don sha shilliang ka Wah Myntdu da kaba pynlong iaka jingpynrung dkhot bad thaw iaki primary unit haka shnong Phlongingkhaw, Madur bad ka Sohmynting.

Kane ka jinghiar ka UDP Jowai Circle sha kine ki shnong kala long haka 6, 7 bad 9 tarik une u bnai Kyllalyngkot  haka jingialam u president ka UDP West Jaintia Hills uba long ruh u kyrtong UDP na Jowai Constituency u Ma Moonlight Pariat haka jingiadonlang u General Secretary ka UDP u ma Kitboklang Nongtdu bad kiwei kiwei ki nongkyrshan ba radbah ka UDP na Jowai bad ki shnong kiba bapher.

Haka 6 tarik ka UDP kala jied iaki nongkitkam ka party ha UDP Phlongingkhaw ha kaba la jied president ia u Kiio Suting, vice president Radhan Mukhim, secretary Barlo Muruh, assistant secretary Wadlang Mukhim bad advisior u Tiarsingh Nongrum bad 20 ngut ki dkhot. Ka UDP kala pynrung dkhot ruh  123 ngut ha kane ka shnong.

Ha ka shnong Madur haka jingialang kaba long haka 7 tarik Kyllalyngkot la jied iaki nongialam kiba kynthup ia u advisor u ma Esaid Siangshai, president Shimpor Langshiang, vice president Tei Ryngkhlem, secretary Bormi Dkhar, Assistant secretary Heibor Slong bad la jied ruh iaki 20 ngut ki dkhot.

Na kane ka shnong hadu 247 ngut ki nongthep vote kila pynrung dkhot ialade sha ka party UDP.

Ha Sohmynting ki nongialam ka UDP kila hiar haka sngi Nyngkong ban thaw iaka unit jong ka Sohmynting Pyllun, ka unit Dongdien, Dongnein, Dongwah, Dong Iawpynsin bad la jied iaki nongialam bad ki dkhot.

Na ka Sohmynting Pyllun la jied ia Salan Pohleng kum u president, Ham Suting vice president, secretary Neverturn Daw, assistant secretary u Emiphial Dkhar bad Advisor u Lephing Pyrtuh.

Ki nongialam ka Dongdien ki kynthup ia u Rilang Pyrtuh kum u president bad secretary u Petros Pyrtuh. Na Dongnein u president u dei u Osi Dhar, secretary Lutmon Pyrtuh. Na Dongwah u president u Ham Suting bad secretary Friday Ryngkhlem bad Dong Iawpynsin la jied ia u Salan Pyrtuh kum u president bad secretary u Rihunlangki Pyrtuh.

U ma Lephing Pyrtuh u waheh shnong barim ka Sohmynting ula ong ba Sohmynting ka dei ka shnong kaba ieid party riewlum bad ka Party UDP kadei na ki party kaba la wanrah iaka roi ka par ha kane ka shnong haki por jong u (L) Sing Mulieh kum u MLA.

U Ma Moonlight Pariat uba la pynskhem iaki nongkitkam ka party ha kane ka shnongula kyntu ia baroh trei shitom ban pynpoi iaka party sha ka jingjop. Ula khlei iaka jubanlak ba lada poi haka thong un wanrah iaka roi ka par ban pyndep ia kiba sahteng bad ban kiwei kiwei ban roi ban par ka shnong salonsar.

Ha kine ki jingialang ha kine ki lai tylli ki shnong la iadonlang ki nongialam u ma Moonlight Pariat kiba kynthup ia u Sanbok Rymbai ,Biful Lamar, Baitlang Pohsngap, Allwyn Laoo bad kiwei kiwei.