Pynjur ki samla pule NEHU ia ka jingiakhih; Khang tala ia baroh ki khyrdop

Syllad | The Rising MeghalayaNovember 7, 2024

Ki Samla pule ka Skulbah North Eastern Hill University (NEHU), Shillong mynta ka sngi 7 tarik Naiwieng ki la nang pynjur shuh shuh ia ka jingiakhih ka jong ki da kaba khang tala syndon ia baroh ki khyrdop jong kane ka jaka pule namar ka jingleh mynthi jong u Vice Chancellor ka NEHU, u Prof PS Shukla ia ka jingdawa ka jong ki.

Haba pynjur ia kane ka jingiakhih ki samla pule ki la khang ruh ia ki kali ba kin rung shapoh bad ban mih shabar jong ka NEHU campus, hynrei ki la shah tang ia ki briew ba kin rung bad ban mih lyngba ka khyrdop kaba rit.

Nalor kata la sakhi ruh ia ka jingwan poi ki dkhot na ka Tnad ka koit ka khiah kiba wan ban ai drip na ka bynta kito ki samla pule kiba la kem tlot namar ka jingpynlong ia ka jingshong shah thngan kaba la sdang naduh ka step jong ka 6 tarik u Naiwieng..

Lah ban kdew ba ki samla pule hapoh ka lama jong ka North Eastern Hill University Students Union (NEHUSU) ba la kyrshan da ka Khasi Students Union – NEHU Unit ki la pynlong da ka jingshah thngan kaba khlem pud bad khot ruh ia baroh ki samla pule ba kin iasnohkti lang ha kane ka jingiakhih kum ka dak ban pynpaw pyrshah halor ka jingbym lah ban weng ia u Registrar, Deputy Registrar (Academics), Officer on Special Duty (Director, College Development Council) and Guest House In-charge.

Baroh ki kam ki jam hapoh kane ka skulbah NEHU ki la sangeh lut baroh bad kynjah slam slem hadien kane ka jingiakhih jong ki samla pule bad ki nongtrei non-teaching staff hapoh ka lama jong ka NEHUNSA.

Kane ka jinglong jingman ka la wan long ruh wat hadien ba u VC u la pynpaw ruh ba un sa khot iakren mardor ia ki samla ba pynlong jingiakhih kumjuh ia ki nongtrei ban iakren ia pynbeit ia ki jingdawa ki jong ki.

Katba halor ka jingdawa hiar shuki pyrshah ia u, u Shukla u la ong ba um pat long uba kloi ban hiar shuki noh namar la thung ia u da ka President ka Ri India bad ba un bud ia ki rai ki ban sa shim da ka President.