Pynjur ka ASPF ia ka jingdawa ban pynlong ia ka sor Tura kum ka nongbah tlang ka Jylla

Syllad | The Rising MeghalayaMarch 3, 2025

Ka Seng A’chik State People’s Front (ASPF) ka la pynjur ha kaba iadei bad ka jingdawa ban pynlong ia ka sor Tura ka nongbah tlang (Winter Capital) jong ka Jylla da kaba pynlong ia ka jingialang paidbah kaba heh ha Garobadha Merong Bajar ha South West Garo Hills ha ka 1 tarik Lber.

Ha kane ka jingialap pynshai paidbah ba la khot pynlong da ka ASPF Headquarters, Tura, ha ryngkat ka jingiatreilang bad ka Garoland State Movement Committee (GSMC), la sakhi ia ka jingwan iashim bynta jong ki katto katne tylli ki kynhun sengbhalang ba pawkhmat ka thain, kaba kynthup ia ki rangbah shnong, FKJGP, APA ba NGCO.

Kane ka jingialang ka thmu ban ioh ia ka jingkyrshan jong ki paidbah bad ban kyntu ia ka sorkar ba kan pyndep ia kane ka jingkular kaba la slem bha na ka bynta ki paidbah ka Rilum Garo.

Ha kane ka jingialang ba la pyniaid da u Salgra Sangma, Secretary of ASPF’s Garobadha Unit, na ka liang u Anderson M Marak, President ka FKJGP (Garobadha Circle), u la pynkynmaw ia ki paidbah ba wan iashim bynta ba ka sorkar ka dei ban burom ia ki jingkular ba ka la ai da ki nongseng ia ka jylla.

U Willat Ch Marak, President ka A’chik Progressive Approach (APA) Garobadha Unit, u la kular ban ieng skhem ha kane ka jingiakhih, katba u Balkarin Marak, Acting Chairman of GSMC u la pynshlur ia ka jingiashim bynta jong ki paidbah da kaba iai ban ba kane ka jingialeh kan iai bteng tad haduh ban da pynurlong ia kane ka jingdawa.

Ka nongiasaid ain ka Bernita Marak ka la khot ia ki nongmihkhmat ba la jied kaba kynthup ia ki MLA bad ki MDC ban buh hakhmat eh ia kane ka mat hapoh ka iingdorbar thaw ain da kaba ong, “Ki paidbah ka Rilum Garo ki la buh ia ka jingshaniah ha phi -mynta phi dei ban pynpaw bad iakren halor ki jingeh jong ki.”