Pynjari 144 CrPC ha Mynkjai ban ioh bret ñiut ka JMB shipor

Syllad | The Rising MeghalayaAugust 8, 2021

U Sub Divisional Magistrate, Amlarem Civil Sub Division ula pynjari da ka kyndon aiñ 144 CrPC ban tem ia kino kino ki jingkynad kaba lah ban ktah iaka shongsuk shongsaiñ hadien ba ki 7 shnong kila bteng ban pyrshah iaka jingthmu bret ñiut ka Jowai Municipal Board (JMB) ha Mynkjai.

Katkum ka hukum kaba la pynmih u Sub Divisional Magistrate, Amlarem Civil Sub Division haka sngi U Blei, ula ong ba ka bor synshar district haka 2 tarik une u bnai Nailar kala lum jingialang ia baroh kiba don bynta ne ki shnong kiba marjan bad ka Mynkjai, ka jaka theh ñiut ka Jowai. Ha kane ka jingialang la rai ban bteng ban bret biang iaki ñiut kiba mih na sor Jowai da ka JMB tad haduh bala lah ban pynbiang iaka jaka theh ñiut ba pura kaban shimpor ban pynbiang haduh 6 bnai.

Ka hukum ka ong ba u Chief Executive Officer, JMB ul dei ban pynthikna ban peit ba ka jingtheh ïaki ñiut kam dei ban long kaba thurmur.

“Ka jingialang jong ki shnong kiba hap ha katei ka jaka kaba long haka 6 tarik kila rai da kawei ka sur ban pyrshah jur ia kane ka jingthmu theh ñiut shipor ha Mynkjai, hynrei namar ba ka Jaintia Hills Autonomous District Council bad U Myntri Pynroi Sor kila shimkhia ban pynbeit ia kane ka kam, kumta ban tem iaka jingkynad ne ka jinghuri hura ban wanrah iaka shongsuk shongsaiñ nga U Abhilash Baranwal, Sub-Divisional Magistrate, Amlarem Civil Sub-Division nga la pynjari da ka kyndon aiñ 144 CrpC ban khanglad iaka jinglum paidbah palat iaka 5 ngut ban khang pyrshah ban rah iaki tiar pynmynsaw kaba kynthup iaki dieng, ki maw ha Mynkjai,” la ong ka hukum u Sub Divisional Magistrate Amlarem bad ula ong ba kane ka hukum kan treikam mardor.

La bthah ia u CEO jong ka JMB ban pynthikna ban ka Solid Waste Management Rules 2016 kaba la pynteikam da ka Ministry of Environment, Forest and Climate Change on 8^th April 2016 ba un bud ryntih ha kaban theh iaki ñiut ha Mynkjai ban shim iaka sienjam ban pyntreikam iaka jingdawa jong ki 7 shnong halor ka jingdawa ba ki shimkhia ba ka jingtheh niut ha katei ka jaka kalong kaba ktah iaka koit ka khiah bad kam dei satia katkum ka stad saian.