Pynioh jaka ka Sorkar sha ki 2426 ngut ki briew bad kynhun ha Revenue Land

Syllad | The Rising MeghalayaFebruary 27, 2024

U Myntri ka Tnat Revenue & Disaster Management u Bah Kyrmen Shylla haka 27 tarik Rymphang, u la pyntip hapoh ka iingdorbar thawain ba ki don kumba 2426 ngut ki briew bad ki kynhun seng kiba la ioh jaka hapoh ka jaka sorkar ne revenue land.

Ia kane u Myntri u la pynpaw haba jubab ia ka jingkylli ba la wanrah da u nongmihkhmat ka VPP napoh Nongkrem, u Bah Ardent M Basaiawmoit uba la pan jingshai ba kumno ki nong Bangladesh kin lah ban die noh ia ki jaka hapoh Rynjah ia kiba la ai sha ki ha ka por jong ka thma laitluid ka East Pakistan ha u snem 1971.

U Bah Ardent u la buh jingkylli ruh la ki don ne em ki jaka sorkar ba la bhah sha ki MLA lane sha kiba haiing hasem ki jong ki. 

Halor kane u Myntri u la pynpaw ba um shym la don jingtip ei ei ha kaba iadei bad ka jingbhah jaka jong ka sorkar na ka bynta ki MLA lane ia kiba haiing hasem jong ki.

Kumjuh u nongialam ka liang pyrshah u Bah Ronnie V Lyngdoh u la buh jingkylli la ki don ne em ki jaka sorkar kiba ngat ha ka jingshah klun beain.U la ong ba ka sorkar ka la pyrshang ban lum ia ki jaka puta, hynrei lada ki jaka sorkar kim dei kiba la shah klun kumta ruh na ka liang ka sorkar kan ym donkam shuh ban thied jaka na ka bynta ban pyntreikam ia ki projek bapher bapher.

Na ka liang u Myntri haba jubab u la ong ba ki don katto katne ki briew kiba pyrshang ban klun ia ki jaka sorkar bad leit ruh sha ka iingbishar, hynrei ngi ieng skhem halor ka nongrim ba kine ki jaka ki dei jong ka sorkar.

Shuh shuh u Myntri u la ong ba um don satia ia ki jingtip kiba bniah ha kaba iadei bad ka jingkylli ba la wanrah da u nongmihkhmat ka VPP napoh Mawlai, u Bah Brightstarwell Marbaniang ha kaba iadei bad ki khlaw sorkar ba la pynkylla jaka shong da ki briew ki bym dei ki nongtrei jong kane ka tnat.

Kumjuh na ka liang u nongmihkhmat ka TMC na Nongthymmai u Bah Charles Pyngrope u la iai ban halor ka jingdonkam ia ka sorkar ba kan pynthymmai ha kaba iadei bad ka dor ban ai wai ia ki jaka sorkar khnang ban kyntiew ruh ia ka iarong ka sorkar.