Pynher shithi ki nonghikai SSA na Rilum Jaintia sha u Conrad Lahkmen, phah hiar shuki ia u myntri pule puthi

Syllad | The Rising MeghalayaDecember 23, 2021

Ngam don pisa ban thied jaiñ thymmai ïaki khun ha kane ka Khristmas namar ka pisa katba don nga hap kunai ban pynbiang ja ïa la ki khun, ong kawei ka nonghikai da ka jingjaw ummat hadien ba la dep thoh ïaka shithi kyrpad rit sha u Myntri rangbah ka Jylla mynta ka sngi.

Kane ka nonghikai ka hikai ha kawei na ki skul SSA kaba don ha West Jaintia Hills District bad ka long kawei na ki 12 hajar Sanspah Sawphew wei ngut ki nonghikai ki bym shym pat la ïoh tulop naduh u bnai Nailar (August) mynta u snem haduh mynta ka sngi.

Kane ka nonghikai ka la wan shim bynta lang haka jingïakhih ba khampher hapoh ka shatri Meghalaya SSA School Association haba ki la rai ba baroh 12 hajar ngut tam ba kin phah da ka shithi sha u Myntri rangbah ka Jylla u Conrad K. Sangma bad sha u Myntri ka tnad pule puthi ka Jylla u Bah Lahkmen Rymbui.

Ha kane ka sngi la wan shim bynta kumba 50 ngut eiei ki nonghikai kiba la phah shithi lyngba ka ïing dak Jowai.

Ha kane ka sngi la don ryngkat u President rangbah u Ma Aristotle Rymbai nalor kiwei kiwei de ki nongïalam jong ka seng.

Ki nongïalam jong ka Meghalaya SSA School Association ki la pynpaw jur halor ka jingleh sting jong ka sorkar Jylla haba ïadei bad ka jingeh jong ki nonghikai bad da ka jingdom ki la dawa ïa u Myntri ka tnad pule puthi ba udei ban hiar shuki mardor bad umdei shuh ban ïeng Election namar ba um long uba bit kum u nongïalam jong ka Jylla bad ki la kyrpad ïaki paidbah jong ka Amlarem Constituency ba kin isynei lem ïaki nonghikai kiba shah lehbeiñ na ka sorkar Jylla.