Pynher krad ka HYC ïaki bar jylla bad khang ïaki dukan bym don kot don sla ha iewdielang

Syllad | The Rising MeghalayaMay 6, 2019

SHILLONG: Ka Hynñiewtrep Youth’s Council (HYC) Mawlai Circle haka sngi Nyngkong kala leit ban khynra ïa ki kot ki sla jong ki nongkhaïi bar Jylla kiba khaïi sla tyrpad bad synsar ha iewdielang ha Mawlai Mawiong (Mawiong Regulated Market).

Ha kane ka jingleit khynra kaba dei ruh lyngba ka “Sier Lapalang Operation” ka HYC kala lap ïa kiba bun ngut ki nongkhaïi bar Jylla kim pat pynthymmai ïa ka Trading License hapoh ka KHADC watla ka por kala kut hynrei la lap ba ki pyndonkam beit da kiba rim bad ka HYC mar mar kala khang khyrdep lut ïa baroh ki dukan bad ki kudam jong ki nongkhaïi bar Jylla tad haduh ba kin da pynbiang bad pynthymmai ïa ka Trading License.

Ka HYC kala lap ruh ba ki don ki nongbylla kiba trei ha katei ka jaka kim don ïa ka Labour License bad ïa kine ruh ka seng kala phah sangeh noh. Ka HYC kala leit ban ïakynduh ruh ïa ka Secretary badei peit ïa kane ka ïew ban ïakren ha kaba ïadei bad ka jingïoh lad jong kine ki Bar Jylla ban khaïi bad trei ha kane ka jaka khlem ki kot ki sla kiba biang.

Ha kane kajuh ka sngi ka HYC Mawlai Circle kala leit ban khynra ruh ïa ki kot ki sla jong ki nongbylla bar Jylla kiba trei ha ka jingkieng jong ka surok by pass ïa kaba la pyntrei da u Bah Bungsing Sohphoh bad hadien ba ka HYC kala jurip ïa ki kot ki sla la lap ba baroh na kine ki nongbylla bar Jylla kim don ïa ki kot ki sla kiba biang khamtam ïa ka Labour License napoh KHADC, kumta ka HYC kala pynher krad lut ïa baroh kine ki nongbylla bar Jylla sha ka jaka kaba ki wan.

U Bah Maiñbor Khyriem u la ïathuh ba hadien ka jingioh jingujor ba ki don ki nongkhaïi ki ba khaïi laitlan khlem da pynthymmai ïa ki kot ki sla ha katei ka jaka kumta kala pynlong ïa ka seng ban leit khynra bad la lap ba la jan baroh na kine ki nongkhaïi kiba khaïi lyngba ki kot ki sla ba la kut por. Ka HYC lyngba ka Sier Lapalang Operation kan ym shong kli kti, hynrei kan ïai khynra na ka por sha ka por ïa baroh ki nongkhaïi bad nongtrei bar Jylla bad dawa ruh na ka Sorkar ba kadei ban pyntreikam noh mardor ïa ka ILP hapoh ka Jylla Meghalaya khnang bah lah ban teh lakam ïa ka jingwan rung kynthlep jong ki bar Jylla.