Pynbna u CM ia ki sienjam ban khmih na ka bynta ka miat ka miat jong ki nongthoh khubor ka Jylla

Syllad | The Rising MeghalayaNovember 17, 2024

U Myntri Rangbah ka Jylla u Conrad K Sangma ha ka 16 tarik u Naiwieng u la pynbna ia ki katto katne ki rai kiba thmu na ka bynta ban khmih lem ha kaba iadei bad ka bha ka miat jong ki Nongthoh Khubor ka Jylla.

Haba kren ha ka jingrakhe ia ka National Press Day ha Shillong, u CM u la pyntip ba hapoh ka skhim ki nongpathai khubor na ka Sorkar jong u ka la kyntiew ia ka song jingiarap na ka T.1 lak sha ka T. 5 lak sha kiba haiing hasem jong ki nongpathai khubor kiba la khlad.

U la ong ruh ba ka sorkar ka la kyntiew ruh ia ka song jingiarap pisa ba ju ai sha ki nongpathai khubor kiba la shah ktah ha ki bynta jong ki dkhot met bad mad ia ki jingeh ba khraw namar ka jingpang jingshitom kaba long na ka T.50,000 sha ka T. 3 lak.

Kumjuh u la pynbna ruh halor ka rai jong ka sorkar ban buh ia ka corpus fund kaba long T.35 lak ka ban don hapoh ka Committee ia kaba yn khlieh da u Commissioner & Secretary lane Principal Secretary ki ban sa ai pura ia ka bor ba kin shim rai shimet halor kumno ban pyndonkam ia ka na ka bynta ka bha ka miat jong ki nongpathai khubor ha ka jylla.

“Kane ka Committee ka ban dei kum ka lynti treikam ha kaba ngin lah ban wanrah ka jingiatreilang bad ki lad pathai khubor bad ka DIPR, ngin don ia u Director bad kiwei kiwei ki ophisar sorkar nalor kumba 2-4 ngut ki nongpathai khubor kum ki dkhot,” u la ong.

“Nga la rai ba ngin buh ia kane ka corpus fund kaba T.35 lak ha kane ka Committee bad ba ngin sa nang pyndap ia ka pisa katba ka nang duna.Ngin pynlong ia ka kum ka kam ba hap leh bad pyntreikam manla u snem hynrei ai ba ka Kynhun Myntri kan mynjur,”ula ong.

Haba kren halor ka phang pdeng jong ka jingrakhe “Changing Nature of the Press”, u CM u la ban jur halor ka jingdonkam ban batai shai bha halor ka jingiapher hapdeng ka kam pathai khubor bad ka jingai jingtip ne khubor ba la buh ne thep ha ki Social Media  lane kano kano kano ka khubor kaba shisha bad kano ka khubor thok.

“Ngi la iohi ia ka jingiapher hapdeng ka kam pathai khubor bad ka jingai jingtip ba malu mala kiba mih ha ki social media lane Whatsapp..hynrei na kino kino ki daw, ki nongpule bad ki paidbah kim lah satia ban bishar kano kadei ka khubor kaba shisha bad kano ka khubor thok ha ki katto katne ki khap,” u la ong da kaba bynra, “Kumta ruh Nga sngew ba ki lad pathai khubor, ki nongthoh khubor ba kin hap ban pynthikna ban batai shai halor ka jingiapher halor ki khubor kiba shu aijingtip malu mala bad ki khubor kiba dei ban leit sha ki paidbah.Kane ka dei ka bynta kaba hap ban khmih bniah. Hynrei kane ka dei shisha ka mat kaba kongsan khamtam ngi kum ki riewsain hima ngi ju ong ia kane bunsien bad ki briew la iohi ba ki kham sngewtynnad ia kaei kaba wan ha ka whatsapp ban ia kaba pule ia kaei kaba don ha ki khubor kaba long kaei kaei kaba sngew bynniaw shibun.”

“Kane ka dei ka jingtynjuh kaba ngi mad bad kane ka dei ka jingkylla ha ka kam pathai khubor. Kam dei tang ha ki kam pathai khubor hynrei nga tharai ka dei ka jingpynthut kaba phi ia iohi da ka jingwan ki technology kaba wan ha ki dur bad kaba pynthut ia baroh.Ka jingpynthut kam dei ka kam kaba sniew kumba baroh ngi tip, ka dei ka jingkylli kumno ngin myllen bad kane ka jingpynthut kiba wan jia,” u la ong.

“Namar kata ka long kaba kongsan kum ka Press Club, ka MEPA, kum ki seng ki nongthoh khubor ba phi hap ban leh ei ei ban iamir jingmut bad la ki jong ki kynhun ban wad ia ki lad ki lynti ban pyniapher hapdeng ki khubor kiba shisha bad ki khubor thok,” u la bynrap.