Pyllait paidbah u Myntri ka Social Welfare ia ka Kot POCSO Act ba la pynkylla sha ka Khasi

Syllad | The Rising MeghalayaMarch 1, 2024

U Myntri ka Tnat Social Welfare, u Bah Paul Lyngdoh haka 29 tarik Rymphang, ha ka jingiadon lang ka Myntri ka Tnat Ain ka Dr. M Ampareen Lyngdoh u la pyllait paidbah ia ka Kot POCSO Act 2012 ba la pynkylla sha ka ktien Khasi “Ki kyndon ain” ha ka jingialang kaba la long hapoh Pinewood hotel Shillong.

Haba kren ha ka jingialang, u Bah Paul u la ong, “Mynta ka sngi ngi la ialum lang na ka bynta ka dawbah kaba ktah ia ka longbriew manbriew bad ban rakhe ia ka jinglong kyrpang jong ka jinglong khynnah.” U la ong ruh ba ka long kaba donkam ba kum ki nongthaw ain bad ki kynhun kiba ia don bynta kin iatreilang ban iakhun pyrshah ia ki kam bymman bad ki kam thombor pyrshah ia ki khunlung khynnah.

U la ong ruh ba kane ka sngi kan dei ka sngi sah jingkynmaw namar ha ka sien kaba nyngkong naduh ba la wanrah ia ki dak pule Khasi naduh ki snem 1841, mynta ka sngi ngi la lah ban pynioh ia kane ka ain POCSO Act ha ka ktien Khasi.

Nalor kata u la ong ruh, “Ai ba ki mombati kiba ngi la tbeh kin ym long tang kum ka dak hynrei ba kin aijingshai ha ki dohnud ki mynsiem jong iwei pa iwei na ngi, khnang ba naduh ki nongthaw ain, ki kmie ki kpa, ki nongialam niam kin shim ba ka dei ka jingkitkhlieh ka jong ki ban pynthikna na ka bynta ka jingshngain jong baroh ki khunlung khynnah ha ka jylla Meghalaya.

U Myntri u la ong ruh ba da ka jingkyrshan jong baroh ha ka imlang ka sahlang yn lah ban tehlakam ia kiba kum kine ki jingjia shah thombor, bad lyngba kane ka ain ba la lah ban pynioh ha ka ktien Khasi yn pynthikna ba kan poi sha baroh ki tyngkong iing jong baroh ki shnong ki thaw bad ban ym don ki ban lait na ka ain.

Shuh shuh u kyntu ruh ia baroh kiba iadon bynta ha kane ka jingialang bad kin shim ia ka jingkut jingmut ban iakhun pyrshah ia kiba kum kine ki kam bymman pyrshah ia ki khunlung khynnah hapoh ka imlang ka sahlang bad ban wanrah ia ka jingkyrmen.

Shibynta jong kane ka prokram, ka Meghalaya State Commission for Protection of Child Rights ruh ka la pyllait ia ka Calendar bad ia ka kaiphot kaba iadei bad ki POCSO case kiba don hapoh ki iingbishar ka jylla..